Batumelebi | ანალიზების აღება სახლში გამოძახებით – ბათუმში, თბილისში, ფოთსა და ქუთაისში ანალიზების აღება სახლში გამოძახებით – ბათუმში, თბილისში, ფოთსა და ქუთაისში – Batumelebi
RU | GE  

ანალიზების აღება სახლში გამოძახებით – ბათუმში, თბილისში, ფოთსა და ქუთაისში

კორონავირუსის პანდემიის პირობებში კლინიკები გადატვირთულია. საპროფილაქტიკო, საბაზისო კვლევების ჩასატარებლად ბევრი ადამიანი თავს იკავებს საავადმყოფოებსა და ლაბორატორიებში მისვლისგან, ვირუსის გადადებისა და გავრცელების შიშით. კლინიკებსა და ლაბორატორიებში, რომლებსაც დავუკავშირდით, ამბობენ, რომ პანდემიის პერიოდში ყოველდღიურად იზრდება იმ ადამიანთა რიცხვი, ვისაც ანალიზების გასაკეთებლად ლაბორატორიის შინ გამოძახება სურს. შესაბამისად, ამ მომსახურების მსურველმა ლაბორატორიაში 1-2  დღით ადრე მაინც უნდა დარეკოს ჩასაწერად. ანალიზების საფასურს ზოგ ლაბორატორიაში შინ მომსახურების ფასიც ემატება, ზოგან კი სახლში ვიზიტი უფასოა და მხოლოდ ანალიზის ფასს იხდით.

გთავაზობთ ბათუმში, თბილისში, ფოთსა და ქუთაისში რამდენიმე კლინიკას, საიდანაც საბაზისო, სისხლისა და შარდის ანალიზების გასაკეთებლად ლაბორატორიის შინ გამოძახებას შეძლებთ.

  • სამედიცინო ცენტრი „ციტო“ 

სამედიცინო ცენტრ „ციტოს“ ლაბორატორია სახლში გამოძახებით ხელმისაწვდომია როგორც თბილისსა და ბათუმში, ასევე ქუთაისში, ზუგდიდში, სენაკსა და გორში, სადაც ე.წ. ლაბ-ექსპრესებია განთავსებული.

„ციტოს“ ლაბორატორიაში სისხლის ანალიზის საფასური 25 ლარია, შარდის – 15. ანალიზების ფასს შინ გამოძახების საფასურიც ემატება დანიშნულების ადგილამდე მანძილის მიხედვით. ბათუმში, მაგალითად, ქალაქის ტერიტორიაზე ანალიზის ფასს ბინაზე მომსახურების 10 ლარი ემატება, მაგრამ ბენზეში, ჩაქვსა და მახინჯაურში გამოძახების შემთხვევაში ეს ფასი შედარებით გაიზრდება.

ჩაწერა 1 დღით ადრეა აუცილებელი. ზემოთჩამოთვლილი ანალიზების გარდა ბინაზე მისვლით აკეთებენ ნებისმიერ სხვა ანალიზს, რაც ლაბორატორია „ციტოშია“ ხელმისაწვდომი.

ნებისმიერი ქალაქიდან, ლაბორატორიის შინ გამოძახების მსურველებმა ჩასაწერად უნდა დარეკონ ნომერზე: +995 (32) 229-06-71

  • სამედიცინო ცენტრი „მრჩეველი“

„მრჩეველის“ ლაბორატორია შინ შეგიძლიათ გამოიძახოთ სამ ქალაქში: თბილისში, ქუთაისსა და ბათუმში. სისხლის საერთო ანალიზის საფასური 20,99 ლარია, შარდის ანალიზის – 17,25 ლარი. ადგილზე მისვლის სერვისი სასურველ მისამართზე უფასოა და იხდით მხოლოდ ანალიზის თანხას.

სასურველია 1 ან 2 დღით ადრე ჩაწერა, რისთვისაც მსურველებმა თბილისიდან, ქუთაისიდან და ბათუმიდან უნდა დარეკონ ნომერზე:  +995 (32) 293-10-00

  • „მედცენტრი“

ბათუმის ტერიტორიაზე სახლში კლინიკა „მედცენტრის“ ლაბორატორიის გამოძახებაცაა შესაძლებელი. სისხლის ანალიზი აქ 15 ლარი ღირს, შარდის – 12, რასაც გამოძახების საფასური, 30 ლარი ემატება ბათუმში, სასურველ მისამართზე. „მედცენტრიდან“ ლაბორატორიის გამოსაძახებლად დაუკავშირდით ცხელ ხაზს ნომერზე: 0422 22 60 60ვ

  • „ემდილაბი“

ლაბორატორია „ემდილაბი“ ქუთაისშია. ქალაქის მცხოვრებლებს ანალიზების გასაკეთებლად ლაბორატორიის გამოძახება შინ შეუძლიათ.

სისხლის ანალიზი „ემდილაბში“ 13 ლარი, შარდის კი – 8 ლარი ღირს. ანალიზების საფასურს ბინაზე მომსახურების 8 ლარი ემატება. შესაძლებელია მისვლა ქუთაისთან ახლომდებარე სოფლებშიც – ქალაქიდან 15, 20 წუთის სავალზე.

საბაზისო ანალიზების გარდა „ემდილაბის“ ლაბორატორიიდან ბინაზე კეთდება სხვა ანალიზებიც, რაც ლაბორატორიაშია ხელმისაწვდომი. აქ ამბობენ, რომ შინ გამოძახების სერვისზე მოთხოვნა მაღალია და ქუთაისში მცხოვრებლებმა მითითებულ ნომერზე ჩასაწერად 2 დღით ადრე უნდა დარეკონ ნომერზე:  +995 (431) 23 71 71

  • „ავერსი“

„ავერსის“ ლაბორატორიის სახლში გამოძახება შესაძლებელია თბილისსა და ფოთში.

ანალიზების საფასურს შინ მომსახურების საფასურიც ემატება, თუმცა კლინიკაში გვეუბნებიან, რომ ანალიზებისა და შინ გამოძახების ფასის დასახელება არ სურთ. „ავერსის“ ლაბორატორიის სახლში გამოძახების მსურველებმა 2 დღით ადრე, ჩასაწერად უნდა დარეკონ ცხელ ხაზზე: +995 (32) 250 07 00

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com