Batumelebi | სააპელაციო სასამართლომ არც ერთი საარჩევნო დავა არ დააკმაყოფილა სააპელაციო სასამართლომ არც ერთი საარჩევნო დავა არ დააკმაყოფილა – Batumelebi
RU | GE  

სააპელაციო სასამართლომ არც ერთი საარჩევნო დავა არ დააკმაყოფილა

ქუთაისის სააპელაციო სასამართლომ უცვლელად დატოვა ბათუმის საქალაქო სასამართლოს მიერ არჩევნებთან დაკავშირებით მიღებული გადაწყვეტილებები. სააპელაციო სასამართლომ არც ერთი საჩივრი არ დააკმაყოფილა, ბათუმის საქალაქო სასამართლოსგან განსხვავებით, სადაც ერთი [ნაწილობრივ] საჩივარი დააკმაყოფილეს.

„დისტანციური წესით შედგა განხილვა. სააპელაციო სასამართლოს გადაწყვეტილება მოგვიანებით შეგვატყობინა მოსამართლის თანაშემწემ, გადაწყვეტილებები ჯერ არ ჩაგვბარებია,“ – ამბობს „ბათუმელებთან“ საია-ს აჭარის ფილიალის ხელმძღვანელი, პაატა დიასამიძე. ეს ორგანიზაცია ბათუმში 14 საარჩევნო უბანზე ხმების ხელახლა გადათვლას ითხოვდა.

საჩივრების დაკმაყოფილებაზე უარი უთხრეს სხვა სამოქალაქო და პოლიტიკურ ორგანიზაციებსაც.

„სხვა მოლოდინი არც გვქონდა, მაგრამ ეს ფორმალური პროცედურა უნდა გაგვევლო,“ – ამბობს უშანგი მიქელაძე, „ერთიანი ნაციონალური მოძრაობის“ ინტერესების დამცველი სასამართლოში.

ბათუმში სულ 7 გაერთიანებული საჩივარი [თითო საჩივარი რამდენიმე საუბნო კომისიას ეხებოდა] მომზადდა, მათგან მხოლოდ ერთი დააკმაყოფილა ნაწილობრივ მოსამართლე ჯუმბერ ბეჟანიძემ ბათუმის საქალაქო სასამართლოში. 75 საჩივრიდან ერთ უბანზე დასთანხმდა ხმების გადათვლას ბათუმის საოლქო კომისიაც.

ჯამში ქუთაისის სააპელაციო სასამართლომ 15 გაერთიანებული საჩივარი განიხილა საარჩევნო დავებთან დაკავშირებით.

ნეტგაზეთის მასალების სხვა გამოცემებში გადაბეჭდვის წესი
ავტორი