„რა თქმა უნდა, ჩვენ ვემიჯნებით ნებისმიერ თავდასხმას, შეურაცხყოფას მედიის წარმომადგენლების, ეს ჩვენთვის ყოველთვის იყო მიუღებელი და მომავალშიც იქნება მიუღებელი. მე იმედი მაქვს, მას ექნება საშუალება ამასთან დაკავშირებით თავისი პოზიცია და რეაქცია დააფიქსიროს, იმიტომ, რომ ის გახლავთ საჯარო მოხელე, პოლიტიკოსი და ამის საშუალება უნდა მისცეთ,“ – აღნიშნა პარლამენტის თავმჯდომარემ და „ქართული ოცნების“ საპარლამენტო სიის წევრმა „აჭარის ტელევიზიასთან“. პარლამენტის თავმჯდომარეს ხელვაჩაურის მერის, ჯუმბერ ვარდმანიძის მიერ „ბათუმელების“ ჟურნალისტის გინების ფაქტის შეფასება სთხოვეს.
საუბარია Batumelebi.ge-ზე 12 ოქტომბერს გამოქვეყნებულ სტატიაში – „მილიონიანი უკანონო მშენებლობა, არჩევნები და უშვერი გინება – 3 ამბავი ხელვაჩაურის მერზე“ გამოყენებულ აუდიოჩანაწერზე, რომელშიც ისმის ჟურნალისტის მისამართით ხელვაჩაურის მერის გინება.
ხელვაჩაურის მერის გაღიზიანება მოჰყვა შეკითხვას, რატომ გადაადგილდება ის „ქართული ოცნების“ მაჟორიტარი კანდიდატის საარჩევნო კამპანიის დროს მერიის ანუ სახელმწიფოს ავტომანქანით, რასაც კანონი კრძალავს. ხელვაჩაურის მერმა ჟურნალისტი სიტყვიერად შეურაცხყო, შენიშვნის შემდეგ კი, რომ მას, როგორც არჩეულ მერს და უმაღლესი სასწავლებლის ლექტორს, არ აქვს უფლება მოქალაქეებს და ჟურნალიტებს ასე ესაუბროს, მერი კიდევ უფრო აგრესიული გახდა და გინებაზე გადავიდა.
შემთხვევას გამოეხმაურა „ჟურნალისტური ეთიკის ქარტია“, სადაც მიიჩნევენ, რომ ხელვაჩაურის მერმა ჟურნალისტის შეურაცხყოფის გამო პასუხი უნდა აგოს.
„ვნახოთ, რამდენად უშველის ბოდიში“ – ასე შეაფასა ჯუმბერ ვარდმანიძის გინება 14 ოქტომბერს თორნიკე რიჟვაძემ, აჭარის მთავრობის თავმჯდომარემ.
