ადმინისტრაციულ რესურსის გამოყენებას, თავისუფალი მედიის მუშაობა და ამომრჩევლის უფლება მიიღოს კანდიდატებისგან მკაფიო საარჩევნო პროგრამა – ამ საკითხებს განსაკუთრებულად გაუსვა ხაზი მარკ კლეიტონმა, ბრიტანეთის ელჩმა საქართველოში, როცა მას წინასაარჩევნო გარემოს გათვალისწინებით არჩევნების ძირითად რისკებზე ვკითხეთ. მარკ კლეიტონი დღეს, 16 ოქტომბერს, ბათუმში საარჩევნო პროცესში ჩართულ სამოქალაქო ორგანიზაციების წარმომადგენლებს შეხვდა.
„უპირველეს ყოვლისა, გაერთიანებული სამეფო მხარს უჭერს არჩევნების თავისუფალ და სამართლიან პროცესს. შესაბამისად, მხარს არ ვუჭერთ ინდივიდუალურ პარტიებს და კანდიდატებს, არამედ თავისუფალ და სამართლიან საარჩევნო პროცესს, რომელიც საშუალებას აძლევს ქართველ ხალხს აირჩიოს საკუთარი პარლამენტი და მთავრობა ყოველგვარი ჩარევის გარეშე. ჩვენთვის ძალიან მნიშვნელოვანია, რომ საარჩევნო კამპანია, საარჩევნო პროცესი წარიმართოს ადმინისტრაციული რესურსის გამოყენების გარეშე, მედიას ჰქონდეს თავისუფლად მუშაობისა და სხვადასხვა მოსაზრების გაშუქების საშუალება. ასევე, ძალიან მნიშვნელოვანია პარტიებისა და კანდიდატების პასუხისმგებლობა, რომ ამომრჩეველს მკაფიო საარჩევნო პროგრამა შესთავაზონ, რათა ხალხმა გაიგოს, თუ ვის და რას ირჩევს საკუთარი ხედვიდან გამომდინარე,“ – აღნიშნა მარკ კლეიტონმა.
ბრიტანეთის ელჩს „ბათუმელებმა“ ჰკითხა პანდემიის გამო ამომრჩეველთა აქტივობის შესაძლო შემცირებაზეც.
„კორონავირუსი რთული საკითხია ყველგან, ჩემს ქვეყანაშიც ახლახანს ახალი მკაცრი შეზღუდვები დავაწესეთ ვირუსის გავრცელების შესაჩერებლად. ამიტომ აბსოლუტურად შემიძლია ხალხის შიში გავიგო, მაგრამ ასევე, რასაც ვადევნებ თვალყურს, მთავრობა აკეთებს ყველაფერს პროცესის უსაფრთხოებისთვის. ვიცი, ცენტრალური საარჩევნო კომისია ძალიან სერიოზულად ეკიდება არჩევნების უსაფრთხოების თემას, ამიტომაც ვისურვებ, რომ ამომრჩევლებს ჰქონდეთ ნდობა პროცესთან დაკავშირებით და მივიდნენ უბნებზე. ეს უმნიშვნელოვანესი ჯანსაღი დემოკრატიის ფუნქციონირებისთვის,“ – გვიპასუხა ბრიტანეთის ელჩმა საქართველოში მარკ კლეიტონმა.
