Batumelebi | ზღვის პირას 12506 კვ.მ მიწის ნაკვეთს აუქციონზე გაყიდიან ზღვის პირას 12506 კვ.მ მიწის ნაკვეთს აუქციონზე გაყიდიან – Batumelebi
RU | GE  

ზღვის პირას 12506 კვ.მ მიწის ნაკვეთს აუქციონზე გაყიდიან

ქობულეთში ზღვის პირას, პირდაპირ პლაჟის გასწვრივ ბათუმის მერია მიწის ნაკვეთს პირობიანი აუქციონის წესით გაყიდის, ნაკვეთი ბათუმის საკუთრებაა. რეესტრის მონაცემებით მომიჯნავედ  კიდევ ორი თავისუფალი ნაკვეთია, მათგან ერთი – ქობულეთის მუნიციპალიტეტის, მეორე კი ფინანსთა და ეკონომიკის სამინისტროს საკუთრებაშია.

ამ დროისთვის  უცნობია ვინ არის დაინტერესებული ამ ნაკვეთის შესყიდვით და ან იგეგმება თუ არა მომიჯნავედ არსებული ნაკვეთების გასხვისება მომავალში, რადგან მერიაში, ასევე აჭარის მთავრობაში, ასეთ ინფორმაციას არ ასაჯაროვებენ.

განკარგულების პროექტის მიხედვით, რომელიც ბათუმის მერიამ საკრებულოში განსახილველად გადააგზავნა, გასაყიდი ნაკვეთი 12 506 კვადრატული მეტრია, აქ რამდენიმე ძველი შენობაცაა განთავსებული, რომელთა საერთო ფართობი 9 127,07 კვადრატული მეტრია.

პროექტის მიხედვით ნაკვეთს მერია პირობიან აუქციოზე გაიტანს, საწყისი ფასი 5 მილიონ 215 000 ლარი იქნება, კვადარატული მეტრის ფასი – დაახლოებით 416 ლარი.

რაც შეეხება პირობას, ამ შემთხვევაში მერია მყიდველს რაიმე განსაკუთრებულ პირობებს არ დაუწესებს, პირობა მხოლოდ საპრივატიზებო საფასურის 12 თვეში გადახდა იქნება.

საკითხის განხილვას ბათუმის საკრებულო ხვალ, 16 ოქტომბერს რიგგარეშე სხდომაზე გეგმავს.

ნეტგაზეთის მასალების სხვა გამოცემებში გადაბეჭდვის წესი
ავტორი