„ყალბი ფეისბუქგვერდი, საიდაც ადამიანებს შეიძლება თანხა მოჰპარონ, ისევ აქტიურია, ისევ საბანკო ბარათის პირადი ნომრის შეყვანა მთხოვეს,“ – გვითხრა მოქალაქემ, რომელსაც ფეისბუქში დასპონსორებული გვერდიდან თავისი საპენსიო დანაზოგის ოდენობის გაგება შესთავაზეს. ყალბი ფეისბუქგვერდი საპენსიო სააგენტოს ოფიციალურ სიმბოლიკას იყენებს და მომხმარებელს თითქოს ვერიფიკაციისთვის 1 ლარის გადასახდელად პირადი საბანკო მონაცემების შეყვანას სთხოვს.
ყალბი ფეისბუქგვერდის შესახებ შინაგან საქმეთა სამინისტროს საპენსიო სააგენტომ ჯერ კიდევ გასული წლის აგვისტოში მიმართა, თუმცა ყალბი ფეისბუქგვერდი ისევ აქტიურია.
„…სოციალურ ქსელში გამოჩნდა კიბერთაღლითების მიერ შექმნილი ყალბი ვებგვერდები, რომლებსაც საპენსიო სააგენტოსთან არანაირი კავშირი არ აქვს. ვებგვერდზე მომხმარებლებს საბანკო ბარათის მონაცემების შეყვანას სთხოვენ. ყალბი ვებგვერდები უკანონოდ იყენებენ საპენსიო სააგენტოს სიმბოლიკას. თაღლითური სქემის შესახებ საპენსიო სააგენტომ მიმართა შინაგან საქმეთა სამინისტროს. მიმდინარეობს გამოძიება,“ – ეს 2019 წლის 19 აგვისტოს ფეისბუქპოსტია.
რა დაადგინა გამოძიებამ და რატომაა ისევ აქტიური ყალბი ფეისბუქგვერდი? – საპენსიო სააგენტოს პრესცენტრში გვიპასუხეს, რომ მათთვის უცნობია, რა გაირკვა გამოძიების შედეგად და უცნობია თაღლითური სქემაც. აქ მომხმარებლებს ისევ მოუწოდებენ, პირადი საბანკო მონაცემები არსად შეიყვანონ.
საპენსიო სააგენტო ყურადღებას ამახვილებს იმაზეც, რომ საპენსიო დანაზოგის შესახებ ინფორმაციის მოპოვება მომხმარებელს ინტერნეტბანკინგის საშუალებით, მარტივად შეუძლია.
„ჩვენ მოგვმართეს არაერთხელ დაზარალებულმა მოქალაქეებმა და დაუყონებლივ მივაწოდეთ ინფორმაცია შინაგან საქმეთა სამინისტროს. ჩვენთვის უცნობია, რა სახის ზარალი მიიღეს ამ ადამიანებმა… “ – გვითხრეს საპენსიო სააგენტოს პრესცენტრში. აქ განმარტეს, რომ თაღლითური საქმიანობით საფრთხე არ დამუქრებია საპენსიო დანაზოგს და ყალბი გვერდების გამოყენებით საფრთხე ადამიანების საბანკო ანგარიშებს ექმნება.
რა ეტაპზეა გასულ წელს დაწყებული გამოძიება? – შინაგან საქმეთა სამინისტროს პრესცენტრში გვითხრეს, რომ გამოძიება სისხლის სამართლის კოდექსის სამი მუხლის შესაბამისად ინტენსიურად გრძელდება, თუმცა ამ დრომდე დაკავებული არავინაა, ყალბი ფეისბუქგვერდები კი, პერიოდულად აქტიურდება.
