მთავარი,სიახლეები,ჯანმრთელობა

ჯანმო არაეთიკურს უწოდებს ჯოგური იმუნიტეტის მეთოდს პანდემიის დასაძლევად

13.10.2020 • 1311
ჯანმო არაეთიკურს უწოდებს ჯოგური იმუნიტეტის მეთოდს პანდემიის დასაძლევად

ჯანდაცვის მსოფლიო ორგანიზაციის ხელმძღვანელმა 12 ოქტომბერს გამართულ ბრიფინგზე იმ ადამიანების მიდგომას, რომლებიც ჯოგური იმუნიტეტის გამომუშავების იმედით მიიჩნევენ, რომ COVID19 თავისუფლად უნდა გავრცელდეს, არაეთიკური უწოდა.

„ჯოგური იმუნიტეტი არის ვაქცინაციისთვის გამოყენებული კონცეფცია, რომელშიც მოსახლეობა შეიძლება დაცული იყოს გარკვეული ვირუსისგან, თუ ვაქცინაციის ბარიერი მიიღწევა,“ – განაცხადა ტედროს ადანომ გებრეისუსმა.

მან აღნიშნა, რომ მაგალითად, წითელასთვის დადგენილია, რომ თუ მოსახლეობის 95 პროცენტი აცრილია, დარჩენილი ხუთი პროცენტიც დაცული იქნება ვირუსის გავრცელებისგან, პოლიომილიტისთვის კი ბარიერი 80 პროცენტით არის შეფასებული.

„ცოტა ხნის წინ იყო საუბარი ვირუსის თავისუფლად გავრცელების გზით ე.წ. „ჯოგური იმუნიტეტის“ მიღწევის კონცეფციის შესახებ.

ჯოგური იმუნიტეტი მიიღწევა ხალხის ვირუსისგან დაცვით და არა მასზე ზემოქმედებით. საზოგადოებრივი ჯანმრთელობის ისტორიაში არასოდეს ყოფილა, რომ ჯოგური იმუნიტეტი გამოყენებულიყო როგორც ეპიდაფეთქებაზე რეაგირების სტრატეგია. ეს მეცნიერულად და ეთიკურად პრობლემატურია.

ჩვენ საკმარისი ცოდნა არ გვაქვს COVID19-ის იმუნიტეტის შესახებ. COVID19- ის გამომწვევი ვირუსით ინფიცირებულ ადამიანთა უმეტესობას პირველი რამდენიმე კვირის განმავლობაში უვითარდება იმუნური პასუხი, მაგრამ ჩვენ არ ვიცით, რამდენად ძლიერი ან ხანგრძლივია ეს იმუნური პასუხი ან როგორ განსხვავდება ის სხვადასხვა ადამიანისთვის. ჩვენ გვაქვს გარკვეული მიგნებები, მაგრამ არა – სრული სურათი. ასევე, არსებობს რამდენიმე მაგალითი, როცა ადამიანი COVID19-ით განმეორებით დაინფიცირდა,” – განაცხადა ჯანმოს ხელმძღვანელმა.

მან ასევე აღნიშნა, რომ უმეტეს ქვეყანში მოსახლეობის 10 პროცენტზე ნაკლები ითვლება დაინფიცირებულად, რაც იმას ნიშნავს, რომ მოსახლეობის უფრო დიდი ნაწილი ამ დაავადებისადმი კვლავ მგრძნობიარეა.

„საშიში ვირუსის დაშვება, რომლის არსიც სრულყოფილად არ გვესმის, უბრალოდ არაეთიკურია. ეს არ არის ვარიანტი,“ – განაცხადა მან. 

ჯანმოს გენერალურმა დირექტორმა ასევე აღნიშნა, რომ ქვეყნებს აქვთ კიდევ ბევრი სხვა საშუალება ადამიანების სიცოცხლის გადასარჩენად.

„პასუხი არის ყოვლისმომცველი მიდგომა – გამოვიყენოთ ყველა ინსტრუმენტი. ვირუსი ძირითადად გადადის ახლო კონტაქტებს შორის და იწვევს აფეთქებებს, რომელთა კონტროლიც შესაძლებელია მიზანმიმართული ზომების მიღებით. დავიცვათ მოწყვლადები. გავაძლიეროთ, განვანათლოთ და ჩავრთოთ საზოგადოება”, – განაცხადა ტედროს ადანომ გებრეისუსმა.

გადაბეჭდვის წესი


ასევე: