Batumelebi | ქობულეთში „ოცნების“ მხადამჭერმა დირექტორმა „ლელოს“ აქტივისტები ბაზარში არ შეუშვა ქობულეთში „ოცნების“ მხადამჭერმა დირექტორმა „ლელოს“ აქტივისტები ბაზარში არ შეუშვა – Batumelebi
RU | GE  

ქობულეთში „ოცნების“ მხადამჭერმა დირექტორმა „ლელოს“ აქტივისტები ბაზარში არ შეუშვა

„საჯარო ტერიტორიაზე არ შეგვიშვეს და ცარიელი ყუთები დაგვიშინეს…“ – ამბობს „ლელოს“ ქობულეთის მაჟორიტარი დეპუტატობის კანდიდატი პაატა ცივაძე. სიტყვიერი და ფიზიკური დაპირისპირება ქობულეთის აგრარულ ბაზართან დღეს, 12 ოქტომბერს, რამდენიმე წუთი გაგრძელდა.

პაატა ცივაძე ამბობს, რომ რამდენიმე დღის წინ „ლელოს“ კომუნიკატორები ბაზრის ტერიტორიიდან ადმინისტრაციამ გამოაძევა.

„მათ ბაზრის დირექტორმა უთხრა, რომ ბაზარში ყველა „ოცნებას“ აძლევს ხმას… ბაზრის დირექტორმა იგივე განუცხადა ადგილზე მისულ ჩვენი შტაბის ხელმძღვანელის მოადგილეს, გია გოლიაძეს, რომ ბაზარში მარტო „ოცნების“ მხარდამჭერები უნდა იყვნენ… დღეს მივედით რადენიმე ერთად და დავგმეთ ზეწოლის და ჩვენი საქმიანობის შეზღუდვის ფაქტი, რადგან ბაზარი საზოგადოებრივი თავშეყრის ადგილია და იგი ვერ იქნება კერძო. გასაგებია კერძო საკუთრება, მაგრამ ბაზარი საჯარო სივრცეა, დაკეტონ და გადააქციონ მაშინ დაკეტილ ზონად,“ – ამბობს „ბათუმელებთან“ პაატა ცივაძე, „ლელოს“ მაჟორიტარი დეპუტატობის კანდიდატი ქობულეთში.

პაატა ცივაძემ გვაჩვენა ვიდეომასალაც, სადაც ბაზრის დირექტორი განმარტავს, რომ ის კერძო მესაკუთრეა და მისი გადასაწყვეტია, ვის შეუშვებს ბაზარში, ხოლო თავად „ქართული ოცნების“ მხარდამჭერია.

„ეს არის წინასაარჩევნო კამპანიის წარმოებაში ხელის შეშლის ფაქტი და შეიცავს დისკრიმინაციის ნიშნებს, რაკი სხვა პარტიას მიეცა იგივე ქმედების, ანუ წინასაარჩევნო შეხვედრის და აგიტაციის წარმოების საშუალება,“ – მიიჩნევს „სამართლიანი არჩევნების“ აჭარა-გურიის კოორდინატორი, მადონა ბერიძე. ის ყურადღებას ამახვილებს იმაზე, რომ ყველა პარტიას და კანდიდატს თანაბარი შესაძლებლობა უნდა მიეცეს ამოჩეველთან წინასაარჩევნო კამპანიის წარმოების.

ამ ფაქტის შესაფასებლად „ბათუმელები“ ზაალ მიქელაძეს დაუკავშირდა, „ქართული ოცნების“ მაჟორიტარობის კანდიდატს ქობულეთში და აჭარის ჯანდაცვის ყოფილ მინისტრს. მან გვითხრა, რომ ამომრჩევლებს ხვდება და ამ დაპირისპირების შესახებ არაფერი იცის. მისთვის მიუღებელია და არ სჯერა ის, რომ აგრარულ ბაზარში ვინმე სააგიტაციო მასალების გასავრცელებლად არ შეუშვან.

„…არ მჯერა, რომ ასე იყო, მე ვიცი, რომ „ლელოს“ აქტივისტები არიგებდნენ მასალებს და არ შეშლიათ აქამდე ხელი, ჩემს ახლობლებთან ერთად ჰქონდათ გადაღებული ფოტო და აქედან ვიცი, ადრე თუ არიგებდნენ უპრობლემოდ, ახლა რატომ შეეშლებოდათ ხელი? არ ვიცი… ჩემთვის მიუღებელია აგრესია და ხელშეშლა, “ – ამბობს ზაალ მიქელაძე.

ნეტგაზეთის მასალების სხვა გამოცემებში გადაბეჭდვის წესი
ავტორი