Batumelebi | კოვიდის ახალი შემთხვევები მატულობს, სიკვდილიანობის მაჩვენებელი დაბალია – რატომ? კოვიდის ახალი შემთხვევები მატულობს, სიკვდილიანობის მაჩვენებელი დაბალია – რატომ? – Batumelebi
RU | GE  

კოვიდის ახალი შემთხვევები მატულობს, სიკვდილიანობის მაჩვენებელი დაბალია – რატომ?

ბოლო დღეებში COVID 19-ით ინფიცირების ახალი შემთხვევების მატება დაფიქსირდა როგორც საქართველოში, ისე მთელს ევროპის რეგიონში. ამის მიუხედავად, კორონავირუსით სიკვდილიანობის მაჩვენებელი კვლავ დაბალია.

„ახალი შემთხვევების რაოდენობა ორ-სამჯერ მაღალია, ვიდრე პირველი პიკის დროს იყო აპრილში. თუმცა სიკვდილიანობის მაჩვენებელი ხუთჯერ უფრო დაბალია, ჰოსპიტალიზაციის შემთხვევებიც ორ-სამჯერ დაბალია, ვიდრე მაშინ”, – ამბობს ჯანმოს ევროპის რეგიონის ოფისის ხელმძღვანელი ჰანს კლუგე.

მისივე თქმით, კოვიდი ახლა სიკვდილიანობის მეხუთე მიზეზია ევროპაში.

ჰანს კლუგეს განცხადებით, ჯანმოს ევროპის ოფისის 53 წევრ ქვეყანაში დადასტურებული შემთხვევები მხოლოდ 10 დღეში 6 მილიონიდან 7 მილიონს გადასცდა. გარდა ამისა, 9 და 10 ოქტომბერს ევროპის რეგიონში ახალი შემთხვევების რეკორდული მაჩვენებელი დაფიქსირდა, როცა დღეში ინფიცირებულთა ჯამურმა რიცხვმა 120 000-ს გადააჭარბა.

კლუგე მიიჩნევს, რომ ოპტიმიზმის საფუძველი არსებობს, რადგან სიტუაცია ისეთივე მძიმე არ არის, როგორც აპრილში პანდემიის პირველი ტალღის დროს. თუმცა, მისივე განცხადებით, ეფექტური საწინააღმდეგო ზომების გარეშე ყოველდღიური სიკვდილიანობის მაჩვენებელმა შესაძლოა რამდენიმე თვეში აპრილის პიკს ოთხჯერ ან ხუთჯერ გადააჭარბოს.

ამავდროულად ჯანმოს სამედიცინო კვლევების საბჭოს გენერალურმა დირექტორმა, სომია სვამინათანმა გუშინ, 14 ოქტომბერს, ჯანმოს მორიგი ვიდეოჩართვისას თქვა, რომ “სიკვდილიანობის მაჩვენებელი მატულობს ახალი შემთხვევების მატებიდან რამდენიმე კვირაში. ასე, რომ თუ ვხედავთ ახალი შემთხვევების უზარმაზარ მატებას ისე, როგორც ახლა, სამწუხაროდ, ამას შეიძლება მოჰყვეს სიკვდილიანობის მატებაც რამდენიმე კვირაში“.

სომია სვამინათანმა სიკვდილიანობის მაჩვენებლის შემცირების მიზეზებზეც ისაუბრა:

„პანდემიის დასაწყისიდან დღემდე, სიკვდილიანობის მაჩვენებელი შემცირებულია და ამას ბევრი მიზეზი აქვს, ერთ-ერთი მიზეზი ის არის, რომ ექიმებმა მსოფლიოს მასშტაბით ისწავლეს, როგორ უმკურნალონ ამ დაავადებას უკეთესად; ადამიანების დიაგნოსტირება ხდება დაავადების ადრეულ ეტაპზე, რადგან თავიდან ჩვენ არ გვქონდა საკმარისი სადიაგნოსტიკო ტესტები და ადამიანები ჰოსპიტალში ხვდებოდნენ მაშინ, როცა უკვე ძალიან ავად იყვნენ, ახლა ტესტირება უფრო ფართოდ ხდება…

შეიძლება სიკვდილიანობის მაჩვენებლის კლება იმანაც გამოიწვია, რომ ახლა გარეთ უფრო მეტად ახალგაზრდა ადამიანები გამოდიან, ხანდაზმულები კი შინ რჩებიან და ცდილობენ თავი დაიცვან ვირუსისგან, მაგრამ ამ დაავადებით ჩვენ მაინც ძალიან ბევრ ადამიანს ვკარგავთ – დაახლოებით 5 000 ადამიანს დღეში და ეს ყველა შემთხვევა შეიძლებოდა თავიდან აგვეცილებინა, ამიტომ არ უნდა ვიყოთ თვითკმაყოფილები, რომ სიკვდილიანობის მაჩვენებელი იკლებს”.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან