როგორც ბსუ-ში მასწავლებლის მომზადების საგანმანათლებლო პროგრამის ხელმძღვანელი, ლელა თავდგირიძე ამბობს, 2018 წელს ბსუ-ში მასწავლებელთა საგანმანათლებლო პროგრამაზე 50 უფასო ადგილი იყო – ჩაირიცხა 31. შარშან 50 მსურველი ჩაირიცხა პროგრამაზე, წელს კი 124 აპლიკანტი ცდილობს მოხვდეს 65 თავისუფალ ადგილზე.
ბათუმის შოთა რუსთაველის სახელმწიფო უნივერსიტეტში მასწავლებლის მომზადების საგანმანათლებლო პროგრამაზე მოთხოვნა იზრდება.
პროგრამაზე მოთხოვნის გაზრდას ადასტურებს ნანა მაკარაძეც – დაწყებითი განათლების პროგრამის ხელმძღვანელი, ბსუ-ს ზუსტ მეცნიერებათა და განათლების ფაკულტეტის ასოცირებული პროფესორი. მისი თქმით, 2016 წელს, როცა ეს ერთწლიანი პროგრამა პირველად ამოქმედდა, სულ რაღაც 13, 15 მსურველი ჩაირიცხა მასწავლებლის მომზადების საგანმანათლებლო პროგრამაზე.
ნანა მაკარაძის თქმით, ამ მიმართულებაზე ძირითადად უკვე დასაქმებული ახალგაზრდა მასწავლებლები ან მაძიებლები ირიცხებიან, რომლებსაც უნივერსიტეტისგან დასაქმების მოლოდინი არ აქვთ. „სკოლებს განსაკუთრებით საბუნებისმეტყველო საგნების კარგი მასწავლებლების პოვნა უჭირთ. როცა სკოლებს ვაკანსიები აქვთ, პირველად ჩვენ გვიკავშირდებიან და გვაცნობენ, რომ ცხადდება კონკურსი და ხომ არ დაინტერესდებოდნენ ჩვენი სტუდენტებიც. ეს იმისთვის, რომ არ გამორჩეთ ყველაზე კომპეტენტურ პრეტენდენტებს კონკურსები სკოლის ვაკანსიებზე“, – ამბობს ნანა მაკარაძე.
მასწავლებლების მომზადების საგანმანათლებლო, დამოუკიდებელი, ერთწლიანი პროგრამა ბაკალავრიატდამთავრებულ ნებისმიერი პროფესიის ადამიანს შეუძლია გაიაროს.
პროგრამა არ ანიჭებს კვალიფიკაციას, თუმცა მისი დასრულება კურსდამთავრებულს სკოლაში მუშაობის უფლებას აძლევს საგნობრივი კომპეტენციის დადასტურების შემდეგ.
____
ამავე თემაზე:
მასწავლებლობის 7 706-მა მსურველმა საგნობრივი გამოცდა ვერ ჩააბარა
