„3 შემთხვევა პირდაპირ უკავშირდება აჭარას“, – თქვა დღეს ამირან გამყრელიძემ, როცა მას ჟურნალისტებმა ჰკითხეს ბოლო კვირაში კოვიდინფიცირებული 7 პირის გარდაცვალების, ანუ სიკვდილიანობის მატების შესახებ. ამირან გამყრელიძემ ასევე თქვა, რომ გარდაცვლილებს შორის 2 პირი არაკონტროლირებადი ტერიტორიებიდან იყო.
„თითოეული სიკვდილი ტრაგედიაა, მაგრამ გარდაცვლილთა საერთო პროცენტული მაჩვენებელი საერთო ინფიცირებულთან, ჯერჯერობით, ჩვენ გვაქვს დაახლოებით 0.57%, რაც ერთ-ერთი ყველაზე დაბალია ევროპაში“, – განაცხადა სხვა ქვეყნებთან შედარებით საქართველოში არსებული ვითარების შესაფასებლად ამირან გამყრელიძემ.
დაავადებათა კონტროლის ეროვნული ცენტრის დირექტორს ასევე ჰკითხეს, რამდენ ქალაქშია შიდა გავრცელება, სადაც კონტაქტების დადგენა თვითდინებით ხდება? ამ კითხვის პასუხად ამირან გამყრელიძემ მეტწილად აჭარაზე ისაუბრა.
„ყველაზე დიდი გავრცელების მაჩვენებელი გვაქვს ამჟამად აჭარის რეგიონში. მთელი ახალი შემთხვევები აჭარის რეგიონზე მოდის – დღეს დილას იყო 60%, თუმცა ბოლო ორი კვირის განმავლობაში ეს მერყეობს 65/70%-ს შორის – ძირითადი გავრცელება გვაქვს აჭარაში, ამდენად იქ გვაქვს შემთხვევები, სადაც პირველწყაროზე, რა თქმა უნდა, ვერ გავდივართ“.
ამირან გამყრელიძემ თქვა, რომ აჭარაში არსებულ სიტუაციაზე ის „ვერ დაგვამშვიდებს“, თუმცა დასძინა, რომ შეზღუდვების ფონზე ინფიცირებულთა მატების ტემპი ოდნავ შემცირდა. ის ამბობს, რომ დაწესებული შეზღუდვების ფონზე [ტრანსპორტის აკრძალვა, დისტანციური სწავლება, რესტორნების ადრე დაკეტვა] აჭარაში ეპიდსიტუაციის სტაბილურობას ელის.
ამირან გამყრელიძეს არაფერი უთქვამს იმის შესახებ, რატომ აღარ ტარდება ბათუმში ამ შაბათ-კვირას უფასო ტესტირება კორონავირუსზე და არც იმაზე, თუ რა ფორმით განახლდება ის ორშაბათიდან.
____
ამავე თემაზე
