აჭარის განათლების სამინისტროს ინფორმაციით, ბათუმში საჯარო სკოლების 21-მა დირექტორმა თანამდებობა დატოვა. როგორც სამინისტროში „ბათუმელებს“ უთხრეს, დირექტორების გათავისუფლების მიზეზი უფლებამოსილების ვადის ამოწურვაა.
ბათუმის რესურსცენტრის განმარტებით, თანამდებობა საკუთარი სურვილით დატოვეს მე-16 საჯარო სკოლის დირექტორმა, თამთა კვარაცხელიამ და მე-13 სკოლის დირექტორმა დათო ჩხაიძემ. დანარჩენს კი უფლებამოსილება შეუჩერდათ.
უფლებამოსილების ვადა არ ამოწურვიათ ბათუმის პირველ, მე-13, მე-18, 23-ე, 26-ე და 29-ე სკოლის დირექტორებს.
საკანონმდებლო ცვლილებების შემდეგ აჭარაში სკოლის დირექტორის მოვალეობის შემსრულებლებს აჭარის განათლების მინისტრი ნიშნავს.
„მას შეუძლია დანიშნოს დირექტორის მოვალეობის შემსრულებელი მანამ, სანამ არ დაინიშნება არჩევნები და არ წარუდგენენ დირექტორობის კანდიდატს სამეურვეო საბჭოს. არჩევნების თარიღს კი საქართველოს განათლების სამინისტრო ადგენს“, – ამბობს გოჩა დავითაძე, ბათუმის რესურსცენტრის ხელმძღვანელი.
მისი თქმით, ძირითადად, ამ სკოლების დირექტორის მოვალეობის შემსრულებლებად ისევ ყოფილი დირექტორები წარადგინეს.
__________________________
მთავარი ფოტო: ბათუმის მე-2 საჯარო სკოლა/„ბათუმელების“ არქივი.
