განათლების სამინისტროს ინფორმაციით, დღეს, 15 სექტემბერს, სწავლა საკლასო ოთახებში 1 577-მა სკოლამ განაახლა, დისტანციურად კი – 730-მდე სკოლამ.
დისტანციური მეთოდით დაიწყო სწავლა ბათუმში და აჭარაშის დანარჩენ მუნიციპალიტეტებშიც, სადაც კორონავირუსის შემთხვევებმა ბოლო პერიოდში იმატა.
სამინისტროში აცხადებენ, რომ საჯარო სკოლები სრულად უზრუნველყოფილია პირბადეებით, დეზობარიერებით, ზედაპირების სადეზინფექციო სითხეებითა და დისტანციური თერმომეტრებით, ასევე სახელმძღვანელოებითა და პირველკლასელთა კომპიუტერებით, რომელთაც მოსწავლეებს ეტაპობრივად გადასცემენ. ეს იმას ნიშნავს, რომ დღეს, 15 სექტემბერს, ბევრს პირველკლასელს ბუქი შესაძლოა არ ჰქონდეს მიღებული.
„რაც შეეხება დისტანციურ სწავლებას, 600 000-ზე მეტ მოსწავლესა და 55 000-მდე მასწავლებელს სპეციალური პროფილები უკვე გააქტიურებული აქვთ და სამინისტროს მხარდაჭერით, შესაძლებლობა აქვთ, სრულყოფილად ისარგებლონ შეთავაზებული ონლაინინსტრუმენტებით – Microsoft office 365-ით, რომელიც აერთიანებს Microsoft TEAMS, OneNote-ს“, – აცხადებს სამინისტრო.
ამ დროისთვის განათლების სამინისტროს ოფიციალურად არ გამოუქვეყნებია, ქვეყნის მასშტაბით რამდენ მოსწავლეს არ აქვს წვდომა ინტერნეტთან და არ გააჩნია ტექნიკური საშუალებები ონლაინგაკვეთილებზე დასასწრებად.
___________________________
მთავარი ფოტო: „ბათუმელების“ არქივი.
