კორონავირუსით ინფიცირების 20-ზე მეტი ახალი შემთხვევა დაკავშირებულია ქორწილებთან – ამის შესახებ დღეს, 12 სექტემბერს აჭარის საზოგადოებრივი ჯანდაცვის ცენტრის დირექტორმა, რუსუდან შავიშვილმა განაცხადა ჟურნალისტებთან.
„კორონავირუსით ინფიცირების 20-ზე მეტი შემთხვევა დაკავშირებულია რიტუალურ პროცესებთან, ანუ საქორწილო დარბაზებში ყოფნის ფაქტს უკავშირდება. 22 გახლავთ უცნობი, შემთხვევა, ანუ პირველ წყარო არ ჩანს ჯერჯერობით. 7 არის სამედიცინო დაწესებულებთან დაკავშირებული შემთხვევა, სამი გახლავთ ხოფის სავაჭრო ცენტრთან დაკავშირებული, მათ შორის არის თანამშრომელი და მისი ოჯახის წევრები. ასევე პატარ-პატარა კერძო, მცირე ბიზნესის წარმომადგენლები, სადაც არ არის ორზე და სამზე მეტი პირი დასაქმებული,“ – განაცხადა რუსუდან შავიშვილმა.
ბოლო 24 საათში აჭარაში კორონავირუსით ინფიცირების 80 ახალი შემთხვევა დადასტურდა, საქართველოს მასშტაბით კი – 158.
შრომის ინსპექციის ცნობით, ბათუმში რეგულაციების გაუთვალისწინებლობისთვის დაჯარიმდა 3 სარიტუალო დარბაზის მფლობელი, საქმიანობა კი 17-მა სარიტუალო დარბაზმა შეაჩერა.
მთავრობის გადაწყვეტილებით, 10 სექტემბრიდან საქართველოში ისევ აიკრძალა ქელეხები და ქორწილები და იუბილეები.
__________
ფოტო: Pixels
