ბათუმში, ერას მოედანზე, დაწყებითი კლასის მოსწავლეების მშობლებმა აქცია გამართეს. ისინი ხელმოწერებს აგროვებენ განცხადებისთვის, რომლითაც საქართველოს განათლების მინისტრსა და პრემიერ-მინისტრს მიმართავენ და ითხოვენ, რომ ბათუმსა და ქობულეთში სკოლა დაიწყოს არა დისტანციურად, არამედ “ისე, როგორც დანარჩენ საქართველოში”, – საკლასო ოთახებში.
“წინააღმდეგი ვართ ყოველგვარი დისტანციური სწავლების, რადგან ამ ხერხით არანაირი სწავლება რეალურად არ ხდება… აღდგეს სწავლება სკოლებში, დაცული იქნეს სანიტარული ნორმები, დისტანცია… აიყვანონ დამატებითი დამლაგებლები ყველა სკოლაში”, – წერია დაწყებითი კლასის მოსწავლეების მშობელთა განცხადებაში.
აქციის ერთ-ერთი მონაწილე თეონა კვერნაძე, რომლის უფროსი შვილი მესამე კლასშია, მეორე კი წელს მიდის პირველ კლასში, ამბობს, რომ მას უკვე აქვს ონლაინსწავლების გამოცდილება და მიაჩნია, რომ დაწყებით კლასებში სწავლების ეს ფორმა არ არის ეფექტური. “მოვითხოვთ, რომ ჩვენმა შვილებმა განათლება მიიღონ სკოლაში და არა ონლაინ, რადგან მაქვს უკვე გამოცდილება, როგორ მიმდინარეობს ონლაინსწავლება – განსაკუთრებით დაწყებით კლასებში და ეს ძალიან რთულია. მაღალ კლასებში ბავშვი შეიძლება დაჯდეს და მოუსმინოს მასწავლებელს, დაბალ კლასებში კატასტროფაა”, – ამბობს ის.
“თუ კორონავირუსი არ ვრცელდება საბავშვო სასრიალოებზე, პლაჟებზე, პარკებში, რესტორნებში, მხოლოდ სკოლაში რატომ დაემართება ჩემს შვილს? არ ვამბობთ, რომ არ არსებობს, გვინდა ვისწავლოთ ცხოვრება კოვიდთან ერთად“, – ამბობს თეონა კვერნაძე. – “მთელი თბილისი აქ ისვენებდა, ახლახან წავიდნენ, კოვიდი ხომ ჩოლოქთან არ გადაუგდიათ და ისე არ დაბრუნებულან სახლებში. ჩვენთან თუ საშიშია, იქაც ხომ არის?”.
აქციაზე შეკრებილი მშობლები ამბობენ, რომ კლასებში უკვე დაშორებულია მერხები ერთმანეთს, შესაძლებელია დისტანციის დაცვა და ყოველ დილით ტემპერატურის შემოწმება ბავშვებისთვის. 
კითხვაზე, თუ რამდენად უსაფრთხოდ მიაჩნიათ აქციის მონაწილე მშობლებს [ბათუმში არსებული ეპიდსიტუაციის გათვალისწინებით] სწავლის დაწყება საკლასო ოთახებში, აქციის ერთ-ერთი მონაწილე სალომე გეგეშიძე პასუხობს: “იმდენად უსაფრთხო შეიძლება იყოს, რამდენადაც დანარჩენ საქართველოში მცხოვრები ბავშვებისთვის და იმდენად უსაფრთხო, რამდენადაც 1-ელ ოქტომბერს რომ დაიწყება სწავლა ფიზიკურად – მაგ შემთვევაში. არაფერი შეღავათია სწავლის ონლაინ დაწყება, თუ პირველ ოქტომბერს მაინც უნდა მივიყვანო ბავშვი სხვა ბავშვებთან ერთად სკოლაში”, – ამბობს ის. – “ბათუმში ისვენებდნენ ბავშვები ყველა კუთხიდან, რამდენიმე დღეა, რაც შიდა ტურისტები წავიდნენ თავიანთ ქალაქებში, იქ სწავლა იწყება, ჩვენთან კი არა”.
