საქართველოში თურქეთის რესპუბლიკის ელჩი, ფატმა ჯერენ იაზგანი საქართველო – თურქეთის სტრატეგიულ პარტნიორობაზე საუბრობს ვიდეოში, რომელიც ჩაწერილია არასამთავრობო ორგანიზაცია გეოპოლიტიკური კვლევების საერთაშორისო ცენტრის მიერ, პროექტის ფარგლებში – „დეზინფორმაციის კვალდაკვალ”.
როგორც ჩანაწერიდან ვიგებთ, მათი პროექტის მიზანია საქართველოსა და მისი პარტნიორების მიმართ დეზინფორმაციის საპასუხოდ, ოფიციალური პირებისა და ექსპერტების მონაწილეობით, საზოგადოებისთვის რეალური ინფორმაციის მიწოდებას.
„ზოგჯერ მესმის რაღაც ხმები და ჭორები ჩვენი ქვეყნების ურთიერთოებების და მისი ისტორიული კონტექსტის შესახებ. მინდა გითხრათ, რომ ამ 27 წლის მანძილზე საქართველო-თურქეთის ურთიერთობებმა უაღრესად ძლიერი საფუძველი შექმნა და ჩვენ ძალიან კარგ მემკვიდრეობას ვტოვებთ ჩვენი მომავლისთვის.
ამ ურთიერთობებს თურქეთი და საქართველო ერთმანეთის ტერიტორიული მთლიანობისა და სუვერენიტეტის პატივისცემაზე დაყრდნობით აშენებენ. ჩვენ არა მხოლოდ პატივს ვცემთ საქართველოს ტერიტორიულ მთლიანობას, არამედ აქტიურად ვუჭერთ მას მხარს. თურქეთი ყოველთვის ხმამაღლა და მკაფიოდ აცხადებს ამის თაობაზე, ასევე ჩვენ ძალიან ღიად ვუჭერთ მხარს საქართველოს მიზანს გახდეს ნატო-ს წევრი სახელმწიფო“, – ამბობს ელჩი.
პრორუსული პოლიტიკური ძალების მხრიდან, ხშირად განიხილება თურქული ინვესტიციები, როგორც საფრთხე საქართველოსთვის. თუმცა, როგორც ელჩი აღნიშნავს, ბევრი თურქული კომპანია ვაჭრობს საქართველოსთან და ახორციელებს ინვესტირებას. ასევე ბევრია ქართული კომპანია ვაჭრობს თურქეთთან და არიან ინვესტორები თურქეთში. „საქართველო-თურქეთს შორის ვაჭრობის მოცულობამ 1 მილიარდ 800 მილიონ დოლარს მიაღწია 2019 წელს. „ეს მართლაც რეკორდულია“, – ამბობს ელჩი.
მისი თქმით, კოვიდ კრიზისი გლობალურად გავლენას ახდენს სავაჭრო ურთიერთობებზე, თუმცა ელჩი დარწმუნებულია, რომ „საქართველო და თურქეთი ერთობლივად შექმნილი კავშირების, ურთიერთგაგებისა და თანამშრომლობის წყალობით შევძლებთ გავაგრძელოთ მნიშვნელოვანი კავშირები, რაც ორმხრივი სარგებლის მომტანია ორივე ქვეყნისათვის.
ჩვენ გვჯერა, რომ რეგიონული პროექტები, რომლებიც ჩვენს მეგობარ და პარტნიორ აზერბაიჯანთან ერთად შევქმენით, ბაქო-თბილისი-ჯეიჰანის მილსადენი, ბაქო-თბილისი-ყარსის რკინიგზა, ტანაპის გაზსადენი, ემსახურება ჩვენი ხალხების და ქვეყნების საშუალო და გრძელვადიან კეთილდღეობას და ამისათვის ჩვენი შვილები მადლიერებით მოგვიხსენიებენ“, – აცხადებს ელჩი.
ფატმა ჯერენ იეზგანი ვიდეოში ასევე საუბრობს მის პირად განწყობებზე საქართველოს მიმართ. ის ამბობს, რომ „როგორც ელჩი ვერ ვიქნებოდი უფრო ბედნიერი სხვა ქვეყანაში, რადგანაც აქ თავს ვგრძნობ, როგორც საკუთარ სახლში. ჩვენ, თურქები და ქართველები ასევე ნათესავი ხალხები ვართ. ბევრი ქართული წარმოშობის მოქალაქე ცხოვრობს თურქეთში. ჩვენ გვაქვს საერთო ოჯახები და გვყავს საერთო შვილები“, – ამბობს ის.
