დღეს, 6 აგვისტოს, ბათუმის საქალაქო სასამართლოში გარემოვაჭრე მზევინარ ქარცივაძე ადმინისტრაციული სამართალდარღვევისთვის, 152-ე მუხლის შესაბამისად, 500 ლარით დააჯარიმეს.
მოქალაქე ფალავანდიშვილის ჩიხში წინდებით, ხელსახოცებითა და სხვა წვრილმანი საქონლით ვაჭრობდა. მოსამართლე კობა გოცირიძემ მიიჩნია, რომ ის საზოგადოებრივ სივრცეში მოძრაობას ზღუდავდა. კობა გოცირიძემ პროცესზე აღნიშნა, რომ პირველ ჯერზე მოვაჭრე მან „შეიცოდა“ და გაფრთხილებით შემოიფარგლა, მაგრამ სამართალდარღვევის მეორე შემთხვევაში 500 ლარით დაჯარიმების გადაწყვეტილება მიიღო.
„ვერ გადავიხდი ვერანაირად ამ ჯარიმას, მეგონა შეღავათს გამიწევდნენ და არ დამაჯარიმებდნენ. მე სხვა შემოსავალი არ მაქვს, რომ არ ვივაჭრო, ოჯახში ვერაფერს მივიტან. ჩემი ერთადერთი შემოსავალი წვრილმანებით ვაჭრობაა. საარსებო წყაროს ვითხოვ. გაჭირვებაა ჩემი მთავარი პრობლემა და მხოლოდ მცირე ადგილს ვითხოვ წვრილმანებით სავაჭროდ, მაღაზიის დაქირავების საშუალება არ მაქვს. 7 დღე მაქვს ჯარიმის გადასახდელად, მაგრამ როგორ, რანაირად, არ ვიცი…“ – ამბობს დაჯარიმებული წვრილმანებით მოვაჭრე.
მზევინარ ქარცივაძე მესამე მოვაჭრეა ფალავანდიშვილის ჩიხიდან, რომელიც 500 ლარით დააჯარიმეს, ქმედების განმეორების შემთხვევაში მათ 1500-ლარიანი ჯარიმა ელით.
მზევინარ ქარცივაძის უფლებებს დღეს სასამართლო პროცესზე მერაბ ღოღობერიძე იცავდა – „საქართველოს კორუფციასთან ბრძოლის საინფორმაციო ცენტრის“ ხელმძღვანელი.
„უშემოსავლოდ დარჩენილ მოვაჭრეებს პანდემიაში არცერთი ლარით დახმარებია მთავრობა. სპეციალურად არ აღიარებს მერია ფალავანდიშვილის ჩიხში წვრილმანებით მოვაჭრეებს გარემოვაჭრეებად, რომ დახმარება არ გასცენ მათთვის, მაგრამ დაჯარიმებისას კი მათზე გარემოვაჭრეთა დაჯარიმების წესი მოქმედებს.
ვთხოვეთ მოსამართლეს გაეთვალისწინებინა პანდემიის მძიმე გავლენა და ამ ადამიანების სოციალური ყოფა, მაგრამ სასამართლომ არასწორი გადაწყვეტილება მიიღო“, – ამბობს მერაბ ღოღობერიძე.
ის ამბობს, რომ ბათუმის მერის მოვალეობის შემსრულებელთან გეგმავს შეხვედრას ფალავანდიშვილის ქუჩის მოვაჭრეთა მძიმე სოციალური მდგომარეობის მათთვის შესაძლო შეღავათების განსახილველად.
,,ჩვენ არ ვენდობით ბათუმის საქალაქო სასამართლოს გადაწყვეტილებას. ბათუმის მერიის ზედამხედველობის ინსპექციას ორმაგი სტანდარტი აქვს, მთელ ქალაქში ვხედავთ გარემოვაჭრეებს და გავლენიანი პირების ოჯახის წევრები დარეკვით ახერხებენ მსგავს ამბებს. ფალავანდიშვილის ჩიხის წინ, მიმდებარე ტერიტორიაზე მაღალი თანამდებობის ჩინოვნიკების ახლობლებს აქვთ მაღაზიები. იმათი დავალებით ჯარიმდებიან ესენი, რადგან მათ უწევენ კონკურენციას – იაფად ყიდიან იმავე საქონელს.
დღევანდელ პროცესზე ცხადი იყო, რომ მოსამართლე კობა გოცირიძემ ხელისუფლების გადაწყვეტილებაზე დასვა ბეჭედი და ხალხის დუხჭირი მდგომარეობის, პანდემიის, ყველაფრის გაუთვალისწინებლად გამოაქვს 500 – 500-ლარიანი განაჩენები. რომ ვუთხარი პროცესზე ეს ქალები გარემოვაჭრეებად მაინც აღიაროს სახელმწიფომ, რომ ერთჯერადი დახმარება მაინც მიიღონ-მეთქი, მიპასუხა, რომ ეს მისი კომპეტენცია არ არის“, – ამბობს მერაბ ღოღობერიძე.
