Batumelebi | „კარფურმა“ და ირმა ინაშვილმა თეატრის თანამშრომლებს წინასაარჩევნოდ სურსათი დაურიგეს „კარფურმა“ და ირმა ინაშვილმა თეატრის თანამშრომლებს წინასაარჩევნოდ სურსათი დაურიგეს – Batumelebi
RU | GE  

„კარფურმა“ და ირმა ინაშვილმა თეატრის თანამშრომლებს წინასაარჩევნოდ სურსათი დაურიგეს

ბათუმის დრამატული და თოჯინების თეატრების მსახიობებს, ასევე ამ სფეროში დასაქმებულ ადამიანებს, „კარფურისა“ და ირმა ინაშვილის სახელით სასურსათო კალათები დაურიგეს. „ბათუმელებთან“ სურსათის დარიგების ფაქტი დრამატული თეატრის დირექტორმა თავდაპირველად უარყო, თუმცა დავით ოქიტაშვილთან ჩვენი საუბრის შემდეგ, კალათების გადაცემის ფაქტი დაადასტურა. ოქიტაშვილის თქმით, სასურსათო კალათა დღეს, 6 აგვისტოს, 77 ადამიანს გადასცეს.

„დაახლოებით ორი კვირის წინ მთხოვეს სია, თუმცა არაფერი მოუტანიათ. თუ მოიტანენ, გეტყვით. არც ის მახსოვს, ვისთან გადავაგზავნე სია“, – გვითხრა თავდაპირველად თეატრის დირექტორმა ოთარ კალანდაძემ. თუმცა მოგვიანებით, როცა „ბათუმელები“ კულტურის პალატის ხელმძღვანელს, დავით ოქიტაშვილს ესაუბრა, აღნიშნული ინფორმაცია თეატრის დირექტორმაც დაგვიდასტურა.

როგორც ოქიტაშვილი „ბათუმელებთან“ ამბობს, „სასურსათო კალათების დარიგება კულტურის მუშაკებისთვის“ ჯერ კიდევ მარტიდან, „პანდემიის დროს დაიწყო“ საქართველოს ხელოვნების მუშაკთა პროფესიულ კავშირთან ერთად.

როცა დავით ოქიტაშვილს ვკითხეთ, თუ ვისი დაფინანსებით შეისყიდეს სურსათი მსახიობებისთვის, მან თქვა, რომ ფინანსური დახმარება „კარფურმა“ და ირმა ინაშვილმა გაუწია.

„პანდემიის დროს გავაკეთე განცხადება, რომ ვისაც სურვილი ჰქონდა,  გამოგვხმაურებოდა, რომ შეჭირვებული ხელოვანი ადამიანებისთვის თანადგომა აღმოგვეჩინა და ყველანაირი აფიშირების და რეკლამის გარეშე დავხმარებოდით. დაახლოებით 300 ადამიანს დავეხმარეთ.

არც პასპორტები მოგვითხოვია მათთვის და არც არაფერი. ახლა რასაც ვუყურებ ქობულეთში, კიტრს და პომიდორს რომ არიგებენ, მეცინება. მე რამდენი კიტრი-პომიდორიც არ უნდა მომცე, ხმას მაინც იმას მივცემ, ვინც მინდა“, – ამბობს ოქიტაშვილი.

თქვენ ფიქრობთ, რომ ბოსტნეული საარჩევნო ხმებისთვის რიგდება? – ვკითხეთ დავით ოქიტაშვილს, რაზეც მან გვიპასუხა: „მე როცა ვუყურებდი ამ ფაქტს, დღეს, ქობულეთში, მეცინებოდა. ჩვენ ჩუმად ვაკეთებთ. „კარფურმა“ გამოგვიყო, ქალბატონმა ირმა ინაშვილმა გამოგვიგზავნა, მაგრამ გვთხოვეს, რომ ჩვენი სახელი არ ახსენოო“.

დავით ოქიტაშვილს ვკითხეთ, თუ აქვს ინფორმაცია, რა ფინანსებს ხარჯავს ირმა ინაშვილი ამ აქციაში, პირადს თუ პარტიულს? – ოქიტაშვილმა გვითხრა, რომ არ იცის.

„რაში გაინტერსებთ, მე მივიტანე და გინდა მოსყიდვა დაარქვით და გინდა სხვა რამ. ჩვენ ჩავაბარეთ დირექციას და ვუთხარით,  საერთოდ არ ეხსენებინათ ვინც მიუტანა. მე ამიტომ ვთქვი, რომ რამდენი ზეთი და კიტრი-პომიდორიც არ უნდა მომიტანო, ვისაც მინდა იმას მივცემ ხმას-თქო. ეს ქვეყანა დაიღუპება, თუ ყველაფერს მოსყიდვას მივაბამთ“, – ამბობს ოქიტაშვილი.

რაც შეეხება ბათუმს, დავით ოქიტაშვილის თქმით, სასურსათო კალათები დარიგდა დრამატულ და თოჯინების თეატრში, ასევე მუსიკალურ ცენტრში.

„ყველას ხომ ვერ მივეხმარებოდით, ამიტომ რა სიებიც გადმოგვცეს, იმ სიებით დაარიგეს. 40 კაცი იყო დრამატული თეატრიდან, 14 – თოჯინების და 23 იყო მუსიკალური ცენტრის“, – გვითხრა მან.

__________

საქართველოს ყოფილი პრემიერ-მინისტრის, ბიძინა ივანიშვილის 2012 წლის ქონებრივ დეკლარაციაში მითითებულია, რომ იგი არის Carrefour-ის ერთ-ერთი აქციონერი, ხოლო 2013 წლის დეკლარაციაში აღარ არის ეს ინფორმაცია.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com