უმაღლესმა საბჭომ უსკოს სამი ახალი წევრი შეარჩია: ირაკლი გვარჯალაძე [13 ხმა], მარიამ გუგუნავა [15 ხმა] და ნოდარ მელაძე [14 ხმა]. გადაწყვეტილება საბჭოს წევრებმა დღეს, 24 ივლისს მიიღეს. დღევანდელ სხდომას უსკოს წევრობის კანდიდატები არ დასწრებიან. დეპუტატებმა კანდიდატებს გუშინ, 23 ივლისს, მოუსმინეს.
აჭარის უმაღლესი საბჭოს არჩევნებს სწორედ უმაღლესი საარჩევნო კომისია ატარებს. აქ სამი ვაკანსია მას შემდეგ გაჩნდა, რაც უფლებამოსილების ვადა ამოეწურათ: თორნიკე მჟავანაძეს, რამაზ გოლომანიძეს და ზურაბ გოლიაძეს.
აჭარის მთავრობის თავმჯდომარემ თორნიკე რიჟვაძემ თითოეულ ვაკანტურ პოზიციაზე ორ-ორი კანდიდატურა, სულ ექვსი პირი წარადგინა, რომლებიც კონკურსის წესით შეარჩიეს.
ირაკლი გვარჯალაძე ბათუმის საოლქო საარჩევნო კომისიაში დროებით წევრად მუშაობდა, მარიამ გუგუნავა უმაღლესი საბჭოს აპარატის თანამშრომელია და აჭარის მთავრობის თავმჯდომარის, თორნიკე რიჟვაძის აპარატის იურიდიული დეპარტამენტის უფროსის მეუღლე.
უსკოს წევრი გახდა ნოდარ მელაძეც. იგი აქამდე ხულოს საოლქო კომისიის თავმჯდომარე იყო. ნოდარ მელაძე პარლამენტარ ანზორ ბოლქვაძის შვილის მამამთილია.
უმაღლესი საარჩევნო კომისიის წევრის ხელფასი თვეში 3300 ლარია, თუმცა იმ წელს, როცა არჩევნები ტარდება, ეს ხელფასი ორმაგდება. უსკოს თავმჯდომარის ხელფასი 5 ათასი ლარია, მოადგილის – 4 ათასი.
