„ლელო საქართველოსთვის“ ქალთა საბჭოს წევრების ინიციატივით, ქვეყანაში გახშირებულ საგანგაშო კრიმინალურ შემთხვევებთან დაკავშირებით, დღეს, 24 ივლისს, 20:00 საათზე, ბათუმში ევროპის მოედანზე გაიმართება სოლიდარობის აქცია: “შვილების გადასარჩენად”.
ფაქტია, რომ ადამიანებზე ძალადობის ფაქტებმა და მკვლელობების სტატისტიკამ შემაშფოთებელი მასშტაბები შეიძინა. საზოგადოებაში მატულობს დაუცველობის განცდა, შიში ოჯახის წევრების უსაფრთხოებასთან დაკავშირებით. სრულყოფილად არ მუშაობს ხელისუფლების არც ერთი რგოლი, არც ერთი უწყება. ეს მდგომარეობა სახელმწიფო სტრუქტურებში დასაქმებულ პროფესიონალ და წესიერ ადამიანებსაც კი აღარ უტოვებს შესაძლებლობას შეცვალონ ძალადობრივი გარემო ჩვენს ქვეყანაში და ამის ფასს ჩვენი შვილები საკუთარი სიცოცხლით იხდიან.
მოგიწოდებთ ყველას, განსაკუთრებით ქალებს, დედებს ახალგაზრდებს შემოგვიერთდით, რათა ყველამ ერთად გავაგონოთ ხელისუფლებას ჩვენი ხმა. ჩვენ არ ვაპირებთ შევეგუოთ არსებულ ვითარებას და მოვითხოვთ ხელისუფლებისგან არა მხოლოდ უკომპრომისო ბრძოლა გამოაცხადოს ძალადობის წინააღმდეგ, დროულად და ობიექტურად გამოიძიოს ყველა დანაშაული, გადადგას ქმედითი ნაბიჯები ძალადობის პრევენციისა და მისი აღმოფხვრისკენ, არამედ დროულად დააყენოს ყველა იმ უმაღლესი თანამდებობის პირის პასუხისმგებლობის საკითხი, ვინც ვერ ან არ ასრულებს კანონით მასზე ნაკისრ ვალდებულებებს.
