ქურდული სამყაროს წევრობისთვის საქართველოში გასამართლებული მინდია ლავასოღლიმ შესაძლოა ერთ კვირაში საპატიმრო დაწესებულება დატოვოს. ეს იმ შემთხვევაში მოხდება, თუკი საქართველო ლავასოღლის ექსტრადაციას ბელორუსიისგან არ მოითხოვს. ზუსტად ერთ კვირაში მინდია ლავასოღლის ბელორუსიაში დაკავებიდან 40 დღე გადის.
„…თუკი საქართველო ოფიციალურად დოკუმენტაციას არ წარადგენს ბელორუსიაში და არ მოითხოვს ექტრადირებას, ამ შემთხვევაში სამართლებრივი საფუძველი აღარ იქნება იმისთვის, რომ მას საექსტრადაციო პატიმრობა გაუგრძელონ. ის დააკავეს და საექსტრადაციო პატიმრობაშია იმიტომ, რომ ძებნილი იყო. საქართველომ უნდა მოითხოვოს ექსტრადირება,“ – განმარტავს „კონსტიტუციის 42-ე მუხლის“ იურისტი, არჩილ ჩოფიკაშვილი.
იურისტი ყურადღებას ამახვილებს „მინსკის კონვენციაზე“, რომელიც ექსტრადირების საკითხს არეგულირებს სხვა საერთაშორისო აქტებთან ერთად. არჩილ ჩოფიკაშვილის თქმით, თუკი საქართველო ამ ერთი კვირის განმავლობაში ექსტრადირებას მოითხოვს, ამ შემთხვევაში ლავასოღლის შესაძლოა კიდევ სამი თვით გაუხანგრძლივონ საექსტრადიციო პატიმრობა და მისი ექსტრადირების საკითხის შესწავლა დაიწყოს. გადაწყვეტილებას ამ კუთხით იუსტიციის მინისტრი იღებს.
მინდია ლავასოღლი ქურდული სამყაროს წევრობისთვის საქართველოში 2018 წელს გაასამართლეს. განაჩენის გამოტანამდე ის საპატიმრო დაწესებულებიდან გაუშვეს იმ მოტივით, რომ წინასწარი დაკავების ვადაში [9 თვე] სამართალდამცავებმა მას კანონიერი ქურდობა ვერ დაუმტკიცეს. ის თურქეთში გადავიდა. ლავასოღლი თურქეთში 2018 წლის ბოლოს დააკავეს და 2020 წლის 20 ივნისამდე საექსტრადაციო პატიმრობაში ჰყავდათ გაურკვეველი მიზეზით.
2020 წლის 20 ივნისს, ბათუმში საპროტესტო აქციების ფონზე, მინდია ლავასოღლი თურქულმა მხარემ საპატიმრო დაწესებულებიდან გაუშვა და მას ქვეყნის დატოვება მოსთხოვა. ლავასოღლი წავიდა ბელორუსიაში, სადაც ის, ადვოკატის ცნობით, აეროპორტშივე დააკავეს, როგორც ძებნილი. ამის შესახებ მინდია ლავასოღლის ადვოკატმა აცნობა ოჯახს.
ამ ამბავს 21 ივნისს გამოეხმაურა საქართველოს პროკურატურა და თქვა, რომ უწყებისთვის უცნობია მინდია ლავასოღლის ბელორუსის რესპუბლიკაში ექსტრადირების შესახებ. პროკურატურამ კიდევ ერთხელ გაიმეორა მედიასთან, რომ ლავასოღლის ექსტრადაციას თურქეთიდან 2018 წლის 8 ნოემბრიდან ითხოვს. პროკურატურას და, ზოგადად, საქართველოს ხელისუფლებას ამ დრომდე არ აქვს პასუხი, რის გამო ვერ მოხერხდა წელიწად-ნახევრის განმავლობაში მინდია ლავასოღლის საქართველოში ექსტრადირება.
„მოითხოვა თუ არა საქართველომ ლავასოღლის ექსტრადირება ამჯერად ბელორუსიიდან?“ – ვკითხეთ გუშინ, 21 ივლისს პროკურატურის პრესცენტრს. ამ უწყებაში გვითხრეს, რომ ამ საკითხზე სიახლე არაფერია 21 ივნისის შემდეგ, როცა პროკურატურამ თქვა, რომ ლავასოღლის ბელორუსიაში გადაყვანის შესახებ არაფერი იცის.
ლავასოღლის საქართველოში ექსტრადირების მოთხოვნით პერმანენტული საპროტესტო აქციები ბათუმში ივნისის დასაწყისში იმართებოდა, მათ შორის თურქეთის საკონსულოსთან გაშლილი იყო კარვებიც.
საპროტესტო აქციების ფონზე ლავასოღლის ოჯახის წევრებს გენერალურ პროკურატურაში შეხვდნენ.
____
ვინ არის ე.წ. კანონიერი ქურდი „ლავასოღლი“, რომელსაც შსს-მ ბრალი წარუდგინა
