Batumelebi | მოვითხოვთ, მიიღონ გადაწყვეტილება მოვაჭრეების გადასარჩენად – მიმართვა აჭარის მთავრობას მოვითხოვთ, მიიღონ გადაწყვეტილება მოვაჭრეების გადასარჩენად – მიმართვა აჭარის მთავრობას – Batumelebi

მოვითხოვთ, მიიღონ გადაწყვეტილება მოვაჭრეების გადასარჩენად – მიმართვა აჭარის მთავრობას

დღეს, 10 ივლისს, აჭარის უმაღლესი საბჭოს ფრაქცია „ერთიანი ნაციონალური მოძრაობის“ წევრმა, გია აბულაძემ ბრიფინგი გამართა. მან მოვაჭრეთა მძიმე ფინანსურ მდგომარეობაზე ისაუბრა.

გია აბულაძის თქმით, ფრაქციამ მაისის დასაწყისში წარადგინა ანტიკრიზისული გეგმა, რომლის მეთექვსმეტე პუნქტი ითვალისწინებდა ბაზრებსა და ბაზრობებზე დასაქმებული მოვაჭრეების გათავისუფლებას გადასახადებისგან და ამ თანხის სუბსიდირებას ბიუჯეტიდან, რაც არ გაითვალისწინეს ბიუჯეტის განხილვისას.

მისი თქმით, მოვაჭრეები მძიმე მდგომარეობაში არიან, ფრაქცია „ნაციონალურ მოძრაობას“ მათთან არაერთი შეხვედრა ჰქონდა და თუ მათ მხარს არ დაუჭერს სახელმწიფო, მოვაჭრეები უბრალოდ გაკოტრდებიან შემოდგომაზე.

„შევაგროვეთ მოვაჭრეთა ასობით ხელმოწერა, რითაც ეს ადამიანები ითხოვენ გადასახადისგან გათავისუფლებას. დღეს ამ ხელმოწერებს წარვუდგენთ აჭარის მთავრობას და მოვითხოვთ სასწრაფოდ მიიღონ გადაწყვეტილება მოვაჭრეების გადასარჩენად. თითოეული მოვაჭრე იხდის ყოველთვიურად, ზოგიც – ყოველდღიურად ბაზარში დგომის გადასახადს, ამ თანხაზეა საუბარი. მართალია, ის პირები, ვისიცაა სავაჭრო ცენტრები და ბაზრები, მთლიანად ვერ გაათავისუფლებენ მოვაჭრეებს გადასახადებისგან, რადგან მიმდინარე ხარჯები აქვთ, მაგრამ ვითხოვთ ამ გადასახადების დასაფარად გამოიყოს სუბსიდია ბიუჯეტიდან – დღეიდან ახალ წლამდე, რომ მოვაჭრეებს პანდემიის მძიმე ტვირთი შეუმსუბუქდეთ,“- ამბობს გია აბულაძე.

როგორც ფრაქციის წევრი ამბობს ამბობს, მას აქტიური კავშირი აქვს ბაზრებსა და ბაზრობებზე დასაქმებულ მოვაჭრეებთან და მათ დიდ უმრავლესობას აქვს საბანკო ვალდებულებები, ასევე ბევრი სხვა ფინანსური პრობლემა, რასაც ისინი სახელმწიფო სუბსიდირების გარეშე, დამოუკიდებლად ვერ გაუმკლავდებიან.

ამავე თემაზე: 

„ხოფის“ ბაზრობის მოვაჭრეები 5 თვით გათავისუფლდებიან გადასახადისგან – რიჟვაძე

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com