2020 წლის 1-ლი იანვრიდან 30 ივნისის ჩათვლით საქართველოში ხე-ტყის უკანონო მოპოვებისა და ტრანსპორტირების 1 532 ფაქტი გამოვლინდა, მათ შორის, 63 ფაქტი სისხლის სამართლის დანაშაულის ნიშნებს შეიცავს.
გარემოსდაცვითი ზედამხედველობის დეპარტამენტის ცნობით, ხე-ტყის უკანონო მოპოვებისა და ტრანსპორტირების ყველაზე მეტი – 609 ფაქტი გამოვლინდა კახეთში. იმერეთში დაფიქსირდა 199 ფაქტი, აჭარაში – 151, სამეგრელო-ზემო სვანეთში – 138, ქვემო ქართლში – 131, შიდა ქართლში – 112, სამცხე-ჯავახეთში – 111, მცხეთა-მთიანეთში – 39, გურიაში – 25, რაჭა-ლეჩხუმი ქვემო სვანეთში კი 11 სამართალდარღვევა გამოვლინდა.
ექვსი თვის განმავლობაში გარემოსდაცვითი ზედამხედველობის დეპარტამენტის თანამშრომლებმა თბილისში უკანონო ტყითსარგებლობის 6 ფაქტი გამოავლინეს.
ჯამში, ამოღებულია უკანონოდ მოპოვებული 2 700 მ3-მდე ხე-ტყე.
დეპარტამენტის ცნობით, ამავე პერიოდში დაფიქსირდა სახერხი საამქროს ტექნიკური რეგლამენტის დარღვევის 149 ფაქტი. ასევე, ამოღებულია 57 ერთეული დაურეგისტრირებელი სახერხი.
გარემოსდაცვითი ზედამხედველობის დეპარტამენტის ინფორმაციით, მასალები, შემდგომი რეაგირებისთვის, შესაბამის უწყებებშია გადაგზავნილი.
___________
ფოტო „ბათუმელების“ არქივიდან
