საქართველოში სპორტული დარბაზები და საცურაო აუზები გაიხსნება მას შემდეგ, როცა გაივლიან შესაბამის ინსპექტირებას – ამის შესახებ დღეს, 6 ივლისს, ბრიფინგზე პრემიერ-მინისტრის სპიკერმა, ირაკლი ჩიქოვანმა განაცხადა.
საქართველოს ჯანდაცვის სამინისტროს შრომის ინსპექციის ინფორმაციით, სპორტულ დარბაზებსა და საცურაო აუზებში ყოველ 6 კვადრატულ მეტრზე ერთი ადამიანი დაიშვება, უპირატესობა მიენიჭება ბუნებრივ ვენტილაციას, ხელოვნური ვენტილაციის პირობებში კი, შესაბამისი პროტოკოლი იქნება შემუშავებული. მთავრობის ინფორმაციით, ეს პროტოკოლი დღეს გამოქვეყნდება.
ასევე, სპორტული დარბაზები, დალაგების შემდგომ, უნდა განიავდეს ორპირი ქარის პრინციპით; საშხაპეები უნდა იყოს გამოყოფილი ტიხრებით; კარადები უნდა იყოს გამოტოვებული [ერთი თავისუფალი კარადა]; პირსახოცები უნდა იყოს ერთჯერადი შეფუთვით.
წესდება ლიმიტი ჯგუფურ ვარჯიშებზე – ჯგუფში უნდა იყოს არაუმეტეს 10 ადამიანი.
რაც შეეხება აუზებს, უნდა ჩატარდეს წყლის კვლევა კოლიბაქტერიებზე.
შეზლონგებზე აკრძალულია შეწოვადი, რბილი მასალის გამოყენება, ყოველი გამოყენების შემდგომ შეზლონგის დეზინფექცია სავალდებულოა.
