ბრიტანელი მომღერალი ქეთი მელუა დღეს, 27 ივნისს, 22:00 საათზე, Youtube-ზე საქველმოქმედო კონცერტს გამართავს. როგორც მომღერალი თავის მიმართვაში ამბობს, კონცერტი საქართველოს წითელი ჯვრის საზოგადოების მხარდასაჭერად გაიმართება.
„ამ უცნაურ პერიოდში ვცდილობდი მომეფიქრებინა, რა შეიძლება გავაკეთო, რომ ვინმეს რამეში გამოვადგე, გადავწყვიტე შევუერთდე საქართველოს წითელი ჯვრის საზოგადოებას, რომელიც შთამბეჭდავ სამუშაოს სწევს საქართველოში COVID19-ის კრიზისის პერიოდში,“ – ამბობს მომღერალი.
ქეთი მელუას კონცერტი ბათუმში, დრამატული თეატრის წინ არსებულ სკვერში განთავსებულ დიდ ეკრანზე გავა.
კონცერტიდან შემოსული თანხა წითელ ჯვარში გადაირიცხება.
საქართველოს წითელი ჯვრის ასოციაციის ინფორმაციით, პანდემიის პირობებში წითელმა ჯვარმა 80 000-მდე ამანათი დაარიგა ქვეყნის მასშტაბით მოსახლეობის მხარდასაჭერად.
მთავარი ფოტო: ქეთი მელუა/მომღერლის ფეისბუქის გვერდიდან
