ერთ-ერთ მოშიმშილე, რომელიც მინდია ლავასოღლის საქართველოში ექსტრადაციას ითხოვს, სასწრაფო-სამედიცინო დახმარების ბრიგადამ კლინიკაში გადაიყვანა. საპროტესტო აქცია თურქეთის საკონსულოსთან გრძელდება. აქ გაშლილია კარვებიც, სადაც ამჟამად 14 ადამიანი განაგრძობს შიმშილობას.
ქურდული სამყაროს წევრობისთვის გასამართლებული მინდია ლავასოღლის მხარდასაჭერად საპროტესტო აქციებს ბათუმში პირველი ივნისიდან მართავენ. ამ დრომდე აჭარის პროკურატურასთან 15 ადამიანი შიმშილობდა. გუშინ, 10 ივნისს, აქციის მონაწილეები თურქეთის საკონსულოსთან გადმოვიდნენ.
აქციის მონაწილეების თქმით, მათ ამ დრომდე პასუხი არც თურქეთის საკონსულოდან მიუღიათ და არც – პროკურატურისგან.
“ჯერ არ ვიცით, რა ფორმით გაგრძელდება საპროტესტო აქციები, მაგრამ პროტესტი გრძელდება,” – ამბობს თამაზ ბაკურიძე. ის ამ საპროტესტო აქციების ერთ-ერთი სპიკერია.
8 ივნისს გენპროკურატურის წარმომადგენლები ლავასოღლის ოჯახის წევრებსა და ადვოკატებს შეხვდნენ, თუმცა ამ შეხვედრაზე ექსტრადაციის შესახებ კონკრეტული არაფერი გარკვეულა. პროკურატურაში ამ დრომდე ოფიციალურად არ განუმარტავთ, რის გამო ვერ ხერხდება მინდია ლავასოღლის ექსტრადაცია.
პროკურატურაში განაცხადეს, რომ საქართველოს პროკურატურის შუამდგომლობის საფუძველზე თურქეთის რესპუბლიკის კომპეტენტური ორგანოები განიხილავენ ძებნილი მინდია ლავასოღლის საქართველოში ექსტრადაციას და მოცემულ ეტაპზე მიმდინარეობს შესაბამისი საერთაშორისო ხელშეკრულებებით გათვალისწინებული საექსტრადაციო პროცედურები.
მინდია ლავასოღლის ქურდული სამყაროს წევრობის მუხლით 2018 წელს 12 წლით თავისუფლების აღკვეთა მიუსაჯეს. განაჩენის გამოტანის დროს იგი საქართველოში არ იმყოფებოდა. მინდია ლავასოღლის ოჯახის წევრებს ეჭვი აქვთ, რომ საქართველოს ხელისუფლებას არ სურს მინდია ლავასოღლის ქართულ ციხეში გადმოყვანა. მათივე თქმით, მინდია ლავასოღლი მიწიდან ოთხი სართულის ქვემოთ გადაიყვანეს და მისი ჯანმრთელობის მდგომარეობა განსაკუთრებით დამძიმდა.
