აჭარის მთავრობის თავმჯდომარე თორნიკე რიჟვაძე გამოეხმარა არასამთავრობო ორგანიზაცია „საერთაშორისო გამჭვირვალობა საქართველოს“ კვლევას ქონებრივ დეკლარაციებთან დაკავშირებით და ორგანიზაცია „ნაციონალურ მოძრაობასთან“ აფილირებულად მოიხსენია.
„არც საკუთარ თავს და არც ხალხს არ ვაკადრებ იმას, რომ კანონდამრღვევი ვიყო. რაც შეეხება კონკრეტული ორგანიზაციის კვლევას და მათ შორის, ნაციონალურ მოძრაობასთან აფილირებულ ორგანიზაციას და მათ სატელიტ მედიასაშუალებებს, რომლებმაც თითქოს რაღაც სკანდალი გამოაცხვეს, ბრალდება წამიყენეს, თითქოს საჯარო სამსახურის შესახებ კანონს ან ინტერესთა შეუთავსებლობის კანონს ვარღვევ,“ – განაცხადა თორნიკე რიჟვაძემ მედიასთან.
„საერთაშორისო გამჭვირვალობა – საქართველო“ თორნიკე რიჟვაძის პასუხად აცხადებს, რომ მსგავსი განცხადებები ქართველი მაღალჩინოსნების ჩვეული პრაქტიკაა და განსხვავებული აზრის მიუღებლობაზე მეტყველებს.
„ხაზგასმით აღვნიშნავთ, რომ შეგნებულად არ ვპასუხობთ პოლიტიკური ტიპის თავდასხმას და შეურაცხყოფას, რადგან ეს მაღალჩინოსნების ჩვეული მანკიერი პრაქტიკაა და უპირველესად, ამ პოლიტიკოსების მხრიდან განსხვავებული აზრის მიუღებლობაზე მიუთითებს,“ – წერს „საერთაშორისო გამჭვირვალობა – საქართველო.”
ორგანიზაციის განცხადებით, თორნიკე რიჟვაძის კომენტარი კიდევ ერთხელ ადასტურებს, რომ ის დღემდე ფლობს 25 პროცენტს შპს „აჭარა ბერრის ლიმითედში”, რომელიც მას საჯარო დაწესებულებაში ინტერესთა კონფლიქტისა და კორუფციის შესახებ კანონის მე-13 მუხლის მე-6 პუნქტის თანახმად, მინდობის ხელშეკრულების საფუძველზე, სამსახურის გავლის ვადით სხვა პირისთვის უნდა გადაეცა. მინდობის ხელშეკრულება არ არის ასახული საჯარო რეესტრის მონაცემებში.
„2018 და 2019 წლების ქონებრივ დეკლარაციებში აჭარის მთავრობის თავმჯდომარე წერს, რომ არის ამ წილის მფლობელი, თუმცა კანონი მას ავალდებულებდა ამ წილის მინდობით გადაცემას.
კიდევ ერთხელ ვადასტურებთ, რომ თორნიკე რიჟვაძის განცხადება არ არის სიმართლე და მისი მიზანია, საზოგადოება შეიყვანოს შეცდომაში.
მოვუწოდებთ საჯარო სამსახურის ბიუროს, რომ გულდასმით შეისწავლოს თორნიკე რიჟვაძის და კვლევაში მოხსენიებულ თანამდებობის სხვა პირებთან დაკავშირებით გამოვლენილი ხარვეზები და შესწავლის შედეგები გაასაჯაროვოს“, – წერს „საერთაშორისო გამჭვირვალობა საქართველო“.
ამავე თემაზე:
რიჟვაძისა და დეპუტატების მიერ შეცდომით შევსებული ქონებრივი დეკლარაციები – TI
