Batumelebi | I-XII კლასელებისთვის ახალი საგანმანათლებლო პროექტი ამოქმედდება – სამინისტრო I-XII კლასელებისთვის ახალი საგანმანათლებლო პროექტი ამოქმედდება – სამინისტრო – Batumelebi

I-XII კლასელებისთვის ახალი საგანმანათლებლო პროექტი ამოქმედდება – სამინისტრო

განათლების სამინისტროს ინფორმაციით, გაეროს ბავშვთა ფონდსა (UNICEF) და განათლების კოალიციას შორის გაფორმებული მემორანდუმის საფუძველზე, ახალი საგანმანათლებლო პროექტი უნდა ამოქმედდეს.

პროექტის მიზანია სკოლამდელი და ზოგადი განათლების სფეროში განათლების უფლების დაცვისა და ხარისხიანი განათლების უზრუნველყოფა.

„ზოგადი განათლების „სკოლის“ ფარგლებში, პირველიდან მეთორმეტე კლასის ჩათვლით მოსწავლეებისთვის ორგანიზებულ სასწავლო პროცესში ჩართვისთვის, შეიქმნება კომპლექსური საშინაო დავალებების კრებულები სხვადასხვა საგნობრივი მიმართულებით, რომლებიც განთავსდება ვებგვერდზე www.el.ge მოსწავლეები დისტანციურად შეძლებენ საჭირო მასალის გაცნობას და დავალებების შესრულებას.

ონლაინპლატფორმაზე დავალებების პირველი კრებული ყოველი საგნის, საგნობრივ ჯგუფისთვის ხელმისაწვდომი იქნება მაისის პირველ კვირაში, ხოლო ყოველ მომდევნო კვირას მოსწავლეები მიიღებენ დავალების ახალ კრებულს. აღნიშნული სასწავლო მასალები ხელმისაწვდომი იქნება მასწავლებლებისთვისაც“, – ნათქვამია სამინისტროს მიერ გავრცელებულ განცხადებაში.

რაც შეეხება პროექტის მეორე – სკოლამდელი განათლების კომპონენტს, სამინისტროს ინფორმაციით, ის გულისხმობს რეკომენდაციებისა და მრავალფეროვანი აქტივობების სატელევიზიო ფორმატში შეთავაზებას სკოლამდელი დაწესებულებების აღსაზრდელების მშობლებისთვის, „რათა მათ ოჯახურ გარემოში განაგრძონ პატარების აღზრდა-განათლება“. ასევე, დისტანციური სწავლების პროცესის მართვის მხარდაჭერის მიზნით სკოლების, მასწავლებლებისა და მშობლებისთვის შეიქმნება დისტანციური სწავლების გზამკვლევები“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com