Batumelebi | გაერო: არქტიკის თავზე მარტში გაჩენილი ოზონის რეკორდულად დიდი ხვრელი უკვე დახურულია გაერო: არქტიკის თავზე მარტში გაჩენილი ოზონის რეკორდულად დიდი ხვრელი უკვე დახურულია – Batumelebi
RU | GE  

გაერო: არქტიკის თავზე მარტში გაჩენილი ოზონის რეკორდულად დიდი ხვრელი უკვე დახურულია

არქტიკის თავზე ოზონის შრის შემცირებამ მარტში რეკორდულ დონეს მიაღწია, უდიდესს 2011 წლის შემდეგ, მაგრამ ხვრელი უკვე დახურულია – ინფორმაციას ამის შესახებ  გაეროს მსოფლიო მეტეროლოგიური ორგანიზაცია (World Meteorological Organization (WMO)) ავრცელებს. 

მსოფლიო მეტეოროლოგიური ორგანიზაცია განმარტავს, რომ ამ გაზაფხულზე, ოზონის ფენის შემცირებამ არქტიკის დიდ ნაწილებზე უპრეცედენტო დონეს მიაღწია. ოზონის შრის შემცირება კი ნიშნავს იმ ფარის შემცირებას, რომელიც ულტრაიისფერი გამოსხივების მავნე დონისგან იცავს  დედამიწაზე სიცოცხლეს. ეს გამოიწვია ატმოსფეროში ოზონის გამანადგურებელი ნივთიერებების დაყოვნებამ და ძალიან ცივმა ზამთარმა სტრატოსფეროში (ატმოსფეროს ფენა 10 კმ და 50 კმ-ზე ზღვის დონიდან).

ამ ორი ფაქტორის კომბინაციამ ოზონის შრე იმაზე მეტად შეამცირა, ვიდრე ეს 2011 წელს მოხდა. ახლა ვითარება ნორმალურ მდგომარეობას დაუბრუნდა – ოზონის ხვრელი დაკეტილია”, – განაცხადა მსოფლიო მეტეოროლოგიური ორგანიზაციის პრესსპიკერმა, კლერ ნულისმა ჟენევაში გამართულ ბრიფინგზე. 

კითხვაზე, ითამაშა თუ არა რაიმე როლი ამ მოვლენაში პანდემიის დროს დაბინძურების შემცირებამ, კლერ ნულისმა უპასუხა, რომ “ეს სრულებით არ უკავშირდება covid 19-ს” – წერს Reuters-ი. 

“სტრატოსფეროში ტემპერატურის მატებამ გამოიწვია ატმოსფეროს ქვედა ფენებიდა ოზონით მდიდარი ჰაერის ადინება, რის შედეგადაც დაიხურა ოზონის ხვრელი”, – წერია მსოფლიო მეტეოროლოგიური ორგანიზაციის ოფიციალურ განცხადებაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან