აჭარაში ოთხი სკოლა-პანსიონი არსებობს, სადაც ამჟამად კორონავირუსის პანდემიის გამო შეწყვეტილია სასწავლო პროცესი, მოსწავლეები კი, რომლებიც ამ პანსიონებში ცხოვრობდნენ, თავიანთ ოჯახებში იმყოფებიან.
„ბათუმელებმა“ ჰკითხა აჭარის განათლების სამინისტროს, ხომ არ აპირებდნენ პანსიონის მოსწავლეებისთვის სასურსათო კალათის სახლში გაგზავნას, რადგანაც სწავლა შეწყდა.
თავდაპირველად სამინისტროში გვითხრეს, რომ სკოლა-პანსიონებში სოციალურად დაუცველი ოჯახების ბავშვები სწავლობენ და ეს ოჯახები ისედაც იღებენ სახელმწიფო შემწეობას, ამიტომ ისინი დამატებით სასურსათო დახმარებას ვერ მიიღებდნენ.
თუმცა დღეს, 16 აპრილს, აჭარის განათლების სამინისტრომ სკოლა-პანსიონებში რეგისტრირებულ მოსწავლეებს სასურსათო კალათა გადასცა.
სოციალურად დაუცველი მოსწავლეებისთვის გათვალისწინებული სასურსათო კალათას შემადგენლობა ერთ ბავშვზე ასეთია:
ხორბლის ფქვილი – 10 კგ, კისელი (185გრ) – 4 ცალი, მანანის ბურღული – 1კგ, ზეთი – 1 ლიტრი, ბრინჯი, წიწიბურა, მაკარონი – 1კგ და საკონდიტრო ნაწარმი – 1 კგ. ასევე, მარილი და შაქარი – 1 კგ, ერთი შეკვრა ჩაი და 3 ქილა (0,370გ) შესქელებული რძე.
სამინისტროს ინფორმაციით, აჭარაში საპანსიონო მომსახურებით ამჟამად 253 მოსწავლე სარგებლობს. სასურსათო კალათაში არსებული პროდუქტი ორ თვეზეა გათვალისწინებული.
„ბენეფიციარები არიან სოციალურად დაუცველი ბავშვები მრავალშვილიანი ოჯახებიდან, ობლები და მარტოხელა დედის შვილები,“ – განაცხადეს სამინისტროში.
