„ქართული მარტო ენაა? – ქართული ქართველთ რწმენაა!“
დღეს დედა ენის დღეა!
42 წლის წინ, საბჭოურმა მმართველობამ გადაწყვიტა საბჭოთა კავშირში შემავალ რესპუბლიკებში ადგილობრივი ენისთვის სახელმწიფო ენის სტატუსი გაეუქმებინა და სახელმწიფო ენად რუსული გამოეცხადებინა. კონსტიტუციაში შესაბამის ცვლილებაზე 1978 წლის 14 აპრილს უნდა ემსჯელათ.
საბჭოთა ხელისუფლების ამ გადაწყვეტილებას თბილისსა და ბათუმში მასობრივი საპროტესტო აქციები მოჰყვა, რომლის ორგანიზატორები სტუდენტები და უმაღლესი სასწავლებლების პროფესორ-მასწავლებლები იყვნენ.
მაშინ ჩვენმა საზოგადოებამ დაიცვა ჩვენი სახელმწიფოს ისტორიული ფუნდამენტი – ქართული ენა, რომელსაც გააჩნია უნიკალური ანბანი. შეძლო და აიძულა საბჭოთა მმართველობა შეეცვალა პოზიცია.
აჭარის განათლების, კულტურისა და სპორტის სამინისტრო გილოცავთ დედა ენის დღეს!
«გააცოცხლე დედა ენა» – ამ სახელწოდებით სამინისტრო, სკოლის მოსწავლეებისთვის აცხადებს დედა ენის დღისადმი მიძღვნილ კონკურსს.
კონკურსის ფარგლებში მონაწილეებს შეუძლიათ შექმნან ფერწერული ნახატი, დაწერონ ჩანახატი ან ლექსი, შექმნან ანიმაციური ფილმი, მხატვრულად წაიკითხონ და ჩაწერონ ლექსი ან მოთხრობა, ნორჩმა კალიგრაფისტებმა უნდა შეასრულონ კალიგრაფიული ნამუშევრები და ა.შ.
მონაწილეებს საკონკურსო ნამუშევრების გამოგზავნა შეუძლიათ 14 მაისის ჩათვლით, შემდეგ ელ. მისამართზე: administracia@moecs.ge
გამარჯვებულებს სხვადასხვა ნომინაციებში გამოავლენს სპეციალურად შექმნილი საკონკურსო კომისია.
გისურვებთ წარმატებებს!
