ჯანდაცვის მსოფლიო ორგანიზაციის გენერალურმა დირექტორმა, ტედროს გებრეისუსმა, ჯანმოს მორიგ ბრიფინგზე თქვა, რომ კორონავირუსი 10-ჯერ უფრო მომაკვდინებელია, ვიდრე H1N1.
“როგორც აქამდე ვთქვით, ეს ახალი ვირუსია და კორონავირუსით გამოწვეული პანდემიაც პირველია. ჩვენ ყველა უწყვეტად ვსწავლობთ და ვაკორექტირებთ ჩვენს სტრატეგიას, რომელიც უახლეს ხელმისაწვდომ ცნობებს ეფუძნება. ჩვენ მხოლოდ იმის თქმა შეგვიძლია ვირუსზე, რაც ვიცით და ვიმოქმედოთ მხოლოდ ამის შესაბამისად. მტკიცებულებები რამდენიმე ქვეყნიდან გვაძლევს მკვეთრ სურათს ამ ვირუსის, იმის შესახებ, თუ როგორ იქცევა, როგორ შევაჩეროთ და როგორ ვებრძოლოთ”, – ამბობს ტედროს გებრეისუსი. – “ჩვენ ვიცით, რომ COVID 19 სწრაფად ვრცელდება და ვიცით, რომ ის არის მომაკვდინებელი – 10-ჯერ უფრო მომაკვდინებელი და საშიში, ვიდრე გრიპის პანდემია 2009 წელს”.
ჯანმოს გენერალურმა დირექტორმა ასევე თქვა, რომ COVID 19 ძალიან სწრაფად იკრებს სიჩქარეს და ამაზე ბევრად ნელი ტემპით იკლებს: “სხვა სიტყვებით გზა კლებისკენ გაცილებით უფრო ნელია, ვიდრე გზა მატებისკენ, ზევით”.
ტედროს გებრეისუსის განმარტებით, ეს ნიშნავს, რომ ვირუსის შესაჩერებლად დაწესებული შეზღუდვები ქვეყნებმა უნდა მოხსნან ნელა და კონტროლის ქვეშ, – “ეს არ უდნა მოხდეს ერთდროულად”.
მან თქვა, რომ კონტროლის მიზნით გატარებული ზომები შეიძლება მოიხსნას იმ შემთხვევაში, როცა ქვეყანაში ტარდება საზოგადოებრივი ჯანდაცვის სწორი ღონისძიებები, სადაც ძალიან მნიშვნელოვანია ინფიცირებულის კონტაქტების დროული და სწორი გამოკვლევა.
