Batumelebi | covid 19-ით დაავადებულთა რაოდენობა ქობულეთში 20-მდე გაიზარდა – 2 ახალი შემთხვევა  covid 19-ით დაავადებულთა რაოდენობა ქობულეთში 20-მდე გაიზარდა – 2 ახალი შემთხვევა  – Batumelebi
RU | GE  

covid 19-ით დაავადებულთა რაოდენობა ქობულეთში 20-მდე გაიზარდა – 2 ახალი შემთხვევა 

ქობულეთში კიდევ ორ პირს დაუდასტურდა covid 19. აჭარის ჯანდაცვის სამინისტროს ინფორმაციით, ამ ეტაპზე ქობულეთში სულ 20 პირს აქვს დადასტურებული covid 19, რამდენიმე პირის ანალიზის პასუხს კი, დღის ბოლოსთვის ელოდებიან. ეს ადამიანები, რომლებსაც ანალიზი აუღეს, თვითიზოლაციაში რჩებიან.

ბათუმში covid 19 დღეს, 12 აპრილს, კიდევ ერთ პირს დაუდასტურეს – ის აზერბაიჯანის მოქალაქეა, რომელიც ამ დრომდე კარანტინში იყო. ის კლინიკა „მედალფაში“ გადაიყვანეს.

„ამ ეტაპზე ჩემთან სულ 24 პაციენტია… არასრულწლოვანი, რომელიც გუშინ შემოიყვანეს, გადაყვანილია თბილისში დედასთან ერთად, დედასაც დადასტურებული ჰქონდა ვირუსი,“ – გვითხრა ლევან ანთაძემ, „მედალფას“ რეგიონულმა დირექტორმა.

დღის ბოლოსთვის ბათუმში კიდევ 15 ადამიანის ანალიზის პასუხს ელიან. ისინი ამ დროისთვის ცხელების ცენტრში არიან მოთავსებულები. ზოგიერთი მათგანი ცხელების ცენტრში კარანტინიდან გადაიყვანეს, ნაწილი – თვითდინებით შევიდა.

12 აპრილის მონაცემებით, საქართველოში სულ კორონავირუსის დადასტურებულ შემთხვევათა რაოდენობაა – 252, მათ შორის გამოჯანმრთელებულია – 63, გარდაცვლილია – 3; კარანტინის რეჟიმში იმყოფება 4 929, ხოლო სტაციონარში მეთვალყურეობის ქვეშ – 405 ადამიანი. უცხოეთიდან სამკურნალოდ გადმოყვანილია საქართველოს 3 მოქალაქე.

ნეტგაზეთის მასალების სხვა გამოცემებში გადაბეჭდვის წესი
ავტორი