Batumelebi | თურქეთში პანდემიის დროს ქუჩის ძაღლებისა და კატების გამოკვებაზე მთავრობა იზრუნებს თურქეთში პანდემიის დროს ქუჩის ძაღლებისა და კატების გამოკვებაზე მთავრობა იზრუნებს – Batumelebi

თურქეთში პანდემიის დროს ქუჩის ძაღლებისა და კატების გამოკვებაზე მთავრობა იზრუნებს

თურქეთში ხელისუფლებამ გადაწყვიტა, თავად იზრუნოს ქუჩაში მცხოვრები ასიათასობით ცხოველის გამოკვებაზე, რადგან კორონავირუსის პანდემიისა და კარანტინის პირობებში თურქეთის მოქალაქეები სახლში რჩებიან და ქუჩაში მცხოვრებ ძაღლებსა და კატებზე ვერ იზრუნებენ.

შინაგან საქმეთა სამინისტრომ გადაწყვიტა, რომ ცხოველების გამოკვებაზე ადგილობრივმა მუნიციპალურმა ორგანიზაციებმა უნდა იზრუნონ ქვეყანაში და მათ მისცა მითითება, მიუტანონ საკვები და წყალი ცხოველთა თავშესაფრებში, ბაღებში, პარკებსა და სხვა ადგილებში მცხოვრებ მიუსაფარ ცხოველებს.

„მიღებულ უნდა იქნას ყველა ზომა, რომ უპატრონო ცხოველებმა არ იშიმშილონ,“ – აცხადებს თურქეთის შინაგან საქმეთა სამინისტრო და დასძენს, რომ აუცილებელია ცხოველთა თავშესაფრებისა და პარკების დეზინფიცირებაც.

ჩვეულებრივ, თურქეთში ქუჩის ძაღლებსა და კატებს მოქალაქეები და აქტივისტები კვებავენ, მაგრამ თვითიზოლაციამ და გადაადგილების შეზღუდვამ ისინი შეაფერხა.

2018 წლის მონაცემებით, სტამბოლში დაახლოებით 162 970 უპატრონო კატა და 128 800 ძაღლი ცხოვრობს.

თურქულ სოციალურ ქსელებში მთავრობის ინიციატივა დადებითად შეაფასეს და ბევრმა შეაქო ქვეყნის შინაგან საქმეთა მინისტრი ამ ნაბიჯისთვის.

________________________

წყარო: BBC 

ფოტო: dailysabah

ამავე თემაზე: 

ქუჩის ძაღლები საკვების გარეშე დარჩნენ – როგორ დავეხმაროთ მათ

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com