Batumelebi | ჯანმოს დირექტორი ტრამპს დაფინანსების შეწყვეტაზე მუქარას პასუხობს ჯანმოს დირექტორი ტრამპს დაფინანსების შეწყვეტაზე მუქარას პასუხობს – Batumelebi

ჯანმოს დირექტორი ტრამპს დაფინანსების შეწყვეტაზე მუქარას პასუხობს

9 აპრილს ჯანდაცვის მსოფლიო ორგანიზაციის ბრიფინგზე ჯანმოს გენერალურმა დირექტორმა ტედროს გებრეისუსმა აშშ-ის მიერ ჯანმოსთვის დაფინანსების შეწყვეტის მუქარასა და ჯანმოს საქმიანობის კრიტიკას უპასუხა.

ტრამპმა ჯანმო დაადანაშაულა ჩინეთზე ორიენტირებულობაში. მან თქვა, რომ ჯანმომ ბევრი შეცდომა დაუშვა COVID-19-თან ბრძოლაში, რომ ტყუილად აკრიტიკებდნენ მის მიერ საზღვრების ჩაკეტვას ვირუსის პრევენციის მიზნით და დაიმუქრა, რომ შესაძლოა ჯანმოს დაფინანსება შეუწყვიტოს.

2020-2021 წლებში აშშ-ს ჯანმოს პროგრამული ბიუჯეტისთვის $115,766,922 აქვს განსაზღვრული. 

ჯანმოს გენერალურმა დირექტორმა ბრიფინგზე განაცხადა, რომ შეცდომები მოსდის ყველას:

„ჩვენ, როგორც ყოველთვის, ამ შემთხვევაშიც გავაკეთებთ ჩვენი ბრძოლის ძლიერი და სუსტი მხარეების შეფასებას, რადგან ჩვენ გვსურს, რომ ვისწავლოთ ჩვენს შეცდომებზე და წავიდეთ წინ. გვახსოვდეს, ეს სრულიად ახალი ვირუსია და როცა მისი გავრცელება დაიწყო, არავინ იცოდა, როგორ მოიქცეოდა. გარდა ამისა, არსებობს კიდევ ბევრი უცნობი ვირუსი, რომლებიც არ ვიცით, მომავალში როგორ მოიქცევიან, ამიტომ უნდა ვმობილიზდეთ ვირუსთან ბრძოლაში,“ – განაცხადა ჯანმოს გენერალურმა დირექტორმა.

ტედროს გებრეისუსმა მოუწოდა მთავრობებს, რომ იმუშაონ პოლიტიკური პარტიების, იდეოლოგიების და ყველა სხვა განსხვავებების მიუხედავად:

„როცა არის ბზარი ეროვნულ და გლობალურ დონეზე პოლიტიკურ პარტიებს, რელიგიურ და სხვა ჯგუფებს შორის, სწორედ მაშინ შეუძლია ვირუსს აფეთქება და ჩვენი დამარცხება. თუ არ გინდათ თვალწინ გვამის ტომრების ნახვა, თავი შეიკავეთ ამ ვირუსის პოლიტიზებისგან, ქვეყნების ერთობა არის ძალიან მნიშვნელოვანი ამ საშიში ვირუსის დასამარცხებლად. ერთობის გარეშე, გარწმუნებთ, ძალიან კარგი ჯანდაცვის სისტემითაც კი მეტი კრიზისი შეექმნება ქვეყანას“.

ტედროს გებრეისუსი: არ არის საჭირო covid–19- ის გამოყენება პოლიტიკური დარტყმების მისაყენებლად. თქვენ გაქვთ მრავალი სხვა გზა საკუთარი თავის დასამკვიდრებლად.

მან მოუწოდა როგორც აშშ-ს, ისე ჩინეთს, G20-ის ქვეყნებსა და მსოფლიოს დანარჩენ ნაწილს გლობალური ერთობისა და ერთიანი ბრძოლისკენ:

„ჩვენ დავკარგეთ მსოფლიოს 60 000-ზე მეტი მოქალაქე, ერთი ადამიანიც კი უძვირფასესია, სულერთია, ახალგაზრდა თუ მოხუცი. მილიონზე მეტი შემთხვევა გვაქვს დადასტურებული და რას ვაკეთებთ? განა ეს საკმარისი არ არის?! ეს საკმარისზე მეტია. ერთი ადამიანის გარდაცვალებაც კატასტროფაა, როცა ამის პრევენცია შეგვიძლია. ამიტომ ჩემი რჩევაა 1. ერთობა ეროვნულ დონეზე; 2. სოლიდარობა გლობალურ დონეზე; 3. მოახდინეთ კოვიდის პოლიტიზირების კარანტინი“.

ჯანმოს გენერალურმა დირექტორმა მადლობა გადაუხადა აშშ-ს აქამდე გაწეული დაფინანსებისთვის, როგორც ორგანიზაციის, ისე წევრი ქვეყნების სახელით და აღნიშნა, რომ მას სჯერა, აშშ კვლავ გააგრძელებს თავისი წვლილის შეტანას ჯანდაცვის მსოფლიო ორგანიზაციის დაფინანსებაში.

„ჩვენ არ ვარჩევთ ადამიანებს ფერის მიხედვით, არ ვარჩევთ მდიდარსა და ღარიბს, აღმოსავლეთსა და დასავლეთს. ჩვენთვის ყველა ერთია. გავერთიანდეთ – ასე მოვიგებთ. თორემ ვინანებთ,“ – განაცხადა ტედროს გებრეისუსმა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან