Batumelebi | „შუახევიჰესმა“ ელექტროენერგიის გამომუშავება დაიწყო „შუახევიჰესმა“ ელექტროენერგიის გამომუშავება დაიწყო – Batumelebi
RU | GE  

„შუახევიჰესმა“ ელექტროენერგიის გამომუშავება დაიწყო

კომპანია Clean Energy Invest-ის ინფორმაციით, „შუახევიჰესის“ ჰიდროელექტროსადგურმა ელექტროენერგიის გამომუშავება დაიწყო. პირველ ეტაპზე ამუშავდა შუახევიჰესი“ [178 მგვტ], ხოლო „სხალთაჰესის“ [9 მგვტ] ოპერირების დაწყება გაზაფხულის ბოლოსთვის იგეგმება.

,,შუახევიჰესმა წარმატებით გაიარა ოპერირებაში შესვლის ყველა ეტაპი და ჩვენ კომერციული ოპერირება დავიწყეთ, რაც იმას ნიშნავს, რომ ჩვენ მიერ გამომუშავებულ ელექტროენერგიას უკვე იღებს საქართველოს მოსახლეობა. რამდენიმე თვეში ოპერირებაში შევა ასევე სხალთაჰესი, რის შემდგომაც უკვე შუახევის ჰესების კასკადი მთელი სიმძლავრით ამუშავდება. ჩვენ გვჯერა, რომ განახლებადი ენერგიის სხვა წყაროებთან ერთად, შუახევიჰესი ქართული ენერგოსისტემის მნიშვნელოვანი რგოლი იქნება ენერგოდამოუკიდებლობის მიღწევის პროცესში“, – კომპანიის აღმასრულებელი დირექტორის, პრაშანტ ჯოშის ამ განცხადებს კომპანია ავრცელებს.

კომპანიის განმარტებით, შუახევისჰესების კასკადი, ჯამურად, გამოიმუშავებს 450 მილიონ კვტ/სთ ელექტროენერგიას, რითაც ყოველწლიურად 200 ათასი ტონით შეამცირებს სასათბურე აირის გამოფრქვევას გარემოში და ხელს შუწყობს ევროპასთან ასოცირების ხელშეკრულების ფარგლებში საქართველოს მიერ აღებული ვალდებულების შესრულებას, კლიმატის ცვლილების შემცირების შესახებ.

ჰესების მიერ გამომუშავებული ელექტროენერგია საქართველოში დარჩება და მნიშვნელოვნად შეამცირებს საქართველოს იმპორტზე დამოკიდებულებას.

„შუახევიჰესის“ პროექტი განახორციელა ნორვეგიულმა კომპანია – Clean Energy Invest-მა, ინდურმა კომპანია – Tata Power-მა და მსოფლიო ბანკის ჯგუფის წევრმა, საერთაშორისო საფინანსო კორპორაცია IFC-მა.

„შუახევიჰესის“ პროექტს აფინანსებს სამი უმსხვილესი ფინანსური ინსტიტუტი: ევროპის რეკონსტრუქციისა და განვითარების ბანკი [EBRD], აზიის განვითარების ბანკი [ADB] და IFC.

ნეტგაზეთის მასალების სხვა გამოცემებში გადაბეჭდვის წესი
ავტორი