Batumelebi | მედცენტრი -„ვისაც სისხლის გაღების სურვილი აქვს, ამისთვის უსაფრთხო გარემოს ვთავაზობთ“ მედცენტრი -„ვისაც სისხლის გაღების სურვილი აქვს, ამისთვის უსაფრთხო გარემოს ვთავაზობთ“ – Batumelebi
RU | GE  

მედცენტრი -„ვისაც სისხლის გაღების სურვილი აქვს, ამისთვის უსაფრთხო გარემოს ვთავაზობთ“

ქვეყანაში ახალი კორონავირუსით გამოწვეულ პრობლემებს, სამწუხაროდ, სისხლის მარაგების ნაკლებობაც დაემატა.

რამდენიმე დღის წინ, დაავადებათა კონტროლის ცენტრის დირექტორის მოადგილე პაატა იმნაძემ მოქალაქეებს სისხლის ჩაბარებისკენ მოუწოდა.

პრობლემები იქმნება სისხლის მარაგების მხრივ. სისხლი ყოველთვის საჭიროა, ამიტომ მოვუწოდებდი ჩვენს თანამოქალაქეებს, ვინც ჯანმრთელია და აქვს ამის ფიზიკური შესაძლებლობა, დავუკავშირდეთ უახლოეს სისხლის სადგურებს, კარგი იქნება, თუ სისხლს ჩავაბარებთ, ეს ქვეყანას ყოველთვის სჭირდება, – განაცხადა პაატა იმნაძემ.

რა მდგომარეობაა ამ კუთხით რეგიონში? ამის თაობაზე „მედცენტრის“ კლინიკური დირექტორი მედეა ქაჯაია საუბრობს.

„მედცენტრის“ კლინიკურ დირექტორი  მედეა ქაჯაია

„მედცენტრის“ კლინიკურ დირექტორი  მედეა ქაჯაია

ქალბატონო მედეა, არის თუ არა რეგიონში სისხლის მარაგის პრობლემა?

პირველ რიგში, მინდა გითხრათ, რომ მაღალტექნოლოგიურ ჰოსპიტალ „მედცენტრში“ ახლახან „სისხლის ბანკი“ ამოქმედდა. ქვეყანაში ახალი კორონავირუსით გამოწვეულ პრობლემებს, სამწუხაროდ, სისხლის მარაგის ნაკლებობაც დაემატა. არიან პაციენტები, რომლებისთვისაც სასიცოცხლოდ მნიშვნელოვანია სისხლის მიწოდება. ამიტომ ჩვენ არაერთხელ მოვუწოდეთ საზოგადოებას, გამოიჩინონ გულისხმიერება, გაიღონ სისხლი სხვისი სიცოცხლის გადასარჩენად!

 რამ გამოიწვია სისხლის მარაგის სიმცირე?

ამაზე რამდენიმე ფაქტორმა მოახდინა გავლენა. პირველი – ეს არის მოწოდება „დარჩი სახლში“, რასაც ეპიდემიის გავრცელების პრევენციისთვის დიდი მნიშვნელობა აქვს. ამას დაემატა ისიც, რომ საყოველთაო ჯანდაცვის პროგრამით, გეგმური ოპერაციების მოცდის პერიოდი 4 თვემდე გაიზარდა. გეგმური ოპერაციების დროს კლინიკაში ორგანიზებულად ხდებოდა პაციენტთა ახლობლების მობილიზება და დონაცია, რითაც ხეხრდებოდა სისხლის ბანკის შევსება, თუმცა მაშინაც კი ხშირად გვქონდა სისხლის კომპონენტების დეფიციტი.

მოწოდებადარჩი სახლში“, ბუნებრივია, ყველამ უნდა გავითავისოთ, მაგრამ ალბათ სისხლის უანგარო გაღება ის შემთხვევაა, როცა გარეთ უნდა გამოვიდეთ.

გეთანხმებით, ამ შემთხვევაში „დარჩი სახლში“ მოწოდებას თუ დავარღვევთ, ეს გამართლებული იქნება. თუ ყველანი დავიცავთ იმ რეკომენდაციებს, რაც პირველ რიგში, სოციალურ დისტანცირებასა და პირადი ჰიგიენის დაცვას ეხება, თუ სიფრთხილით მოვეკიდებით ყველაფერს, მერწმუნეთ, სისხლის გაღებით არც დავზარალდებით და ბევრი ადამიანის სიცოცხლესაც გადავარჩენთ.

მედცენტრი

მედცენტრი

ოსახლეობის ნაწილი შიშობს იმასაც, რომ კლინიკა არაა უსაფრთხო ადგილი, სადაც თავს დაცულად იგრძნობენ.

„მედცენტრის“ შემთხვევაში ხაზგასმით მინდა ვუთხრა მოსახლეობას, რომ ყველა სტანდარტს მაქსიმალურად და ზედმიწევნით ვიცავთ. კლინიკაში ნებისმიერი შემომსვლელი კონტროლდება, მათ შორის მედპერსონალი. ამდენად, ვისაც სურვილი გაუჩნდება, რომ სისხლი გაიღოს, ამისთვის უსაფრთხო გარემოს ვთავაზობთ. კლინიკაში, სისხლის ჩაბარების მსურველს გაესაუბრება კვალიფიციური თერაპევტი, შეკრებს მოკლე ანამნეზს, შემდეგ სისხლში ჰემოგლობინს განსაზღვრავენ და პაციენტის მდგომარობის შეფასების შემდეგ მოხდება დონაცია.

დღეს ბევრ სხვა პრობლემას გადაადგილების შეზღუდვები ემატება. თუ ადამიანს სისხლის გაღების სურვილი აქვს, მაგრამ კლინიკამდე მოსვლას ვერ ახერხებს, ამ შემთხვევაში რას სთავაზობთ?

მსურველმა უნდა დარეკოს „სისხლის ბანკში“ ( 514 07 79 79 ან 596 22 60 60) და ჩვენ მათ ტრანსპორტით უზრუნველვყოფთ, როგორც კლინიკაში მოყვანისას, ისე სახლში დაბრუნებისას.

კიდევ ერთხელ მინდა მოვუწოდო მოსახლეობას – ამ მძიმე პერიოდში, როცა ერთმანეთის გვარდით დგომა განსაკუთრებით მნიშვნელოვანია, „დარჩით სახლში“, მაგრამ სიფრთხილის დაცვით თუ შეძლებთ სისხლის გაღებას, ამით ადამიანების სიცოცხლეს გადაარჩენთ!

ნეტგაზეთის მასალების სხვა გამოცემებში გადაბეჭდვის წესი
ავტორი