მსოფლიოში არსებული ექთნების დეფიციტისა და ამ დარგში ინვესტიციების სიმცირე პანდემიის პირობებში ძალიან ცხადად გამოჩნდა. დღეს ჯანმომ სპეციალური ანგარიში გამოაქვეყნა, სადაც საექთნო დარგში მსოფლიოში არსებულ დეფიციტზე საუბრობს და მოუწოდებს მთავრობებს, ჩადონ ინვესტიციები ახალი ექთნების მომზადების დაჩქარებაში, ასევე იზრუნონ უკვე დასაქმებული ექთნების შენარჩუნებაზე.
ჯანმო: მსოფლიო მასშტაბით მედპერსონალის ნახევარზე მეტს ექთნები წარმოადგენენ და მათ ჯანდაცვის ყველა სისტემაში სასიცოცხლოდ მნიშვნელოვანი როლი აკისრიათ.
მსოფლიოში დაახლოებით 28 მილიონი მედდა მუშაობს. 2013-დან 2018 წლამდე მათი რაოდენობა 4.7 მილიონით გაიზარდა. თუმცა ექთნების დეფიციტი მთელ მსოფლიოში ფიქსირდება და ეს დანაკლისი 5,6 მილიონ კადრს შეადგენს. ამ პრობლემის მოსაგვარებლად ჯანმო მოუწოდებს ქვეყნებს, რომ გაზარდონ საექთნო საქმის კურსდამთავრებულთა რაოდენობა წელიწადში 8%-ით მაინც. ამის პარალელურად შექმნან სამუშაო ადგილები და მიიღონ ზომები ჯანდაცვის სფეროში ექთნების შესანარჩუნებლად.
ექთნების სიმცირე პანდემიის დროს განსაკუთრებით საშიშია, რადგან ისინი პირველ ხაზზე არიან ვირუსთან ბრძოლის ველზე. მედპერსონალის, მათ შორის, ექთნების ინფიცირების ფაქტები კოვიდ 19-ის პანდემიის დროს ბევრ ქვეყანაში დაფიქსირდა. ექთნის დაინფიცირების ერთი შემთხვევა დადასტურდა ბათუმშიც.
ერთ-ერთი ფაქტორი, რის გამოც საექთნო საქმე საქართველოში არ არის მიმზიდველი – დაბალი ანაზღაურებაა. ამის შესახებ „ბათუმელებიც“ წერდა:
ჯანმო: ექთნების პერსონალის რაოდენობას ემუქრება სიბერეც: ყოველი მეექვსე ექთანი მსოფლიოში პენსიაში გავა 10 წელიწადში.
“პოლიტიკოსებმა იციან, რა ღირს პროფესიონალი ექთნების მომზადება და მათი დარგში შენარჩუნება, მაგრამ ბევრი მათგანი რეალურად მხოლოდ ახლა იაზრებს ექთნების პერსონალის ჭეშმარიტ ფასს”, – წერს ექთნების საერთაშორისო ასოციაციის თავმჯდომარე ანეტ კენედი. – “ყოველ დოლარს, ჩადებულს საექთნო საქმის განვითარებაში, მოაქვს ადამიანების ჯანმრთელობისთვის ძალიან თვალსაჩინო და ხელშესახები შედეგი.”
ჯანმოს ანგარიშის საფუძველზე პარტნიორი ორგანიზაციები მოუწოდებენ მთავრობებს: გაზარდონ ექთნების მომზადებასა და დასაქმებაში დაფინანსება, ასევე გააუმჯობესონ ექთნების სამუშაო პირობები, მათ შორის, შრომის სამართლიანი ანაზღაურების სახით და დაიცვან მათი უფლებები უსაფრთხოებისა და ჰიგიენის ნაწილში.
