რუმინეთში მედპერსონალი ხელისუფლებას ადანაშაულებს, ექიმები და მედდები აცხადებენ, რომ სახელმწიფო მათ ვირუსისგან თავდაცვის ელემენტარული საშუალებებითაც კი ვერ უზრუნველყოფს. ინფორმაციას Le Monde ავრცელებს.
სუჩაევა უკრაინისა და რუმინეთის საზღვარზე მდებარე პატარა ქალაქია 100 000 მცხოვრებით. ქალაქში კორონავირუსის პირველივე შემთხვევის დაფიქსირებიდან მალევე, თებერვლის ბოლოს, Covid 19-ით 33 ადამიანი გარდაიცვალა. რუმინეთში სწორედ ეს ქალაქი იქცა კორონავირუსის გავრცელების ძირითად კერად. ქალაქში 3 894 ინფიცირებულია, მხოლოდ 4 აპრილს 148 ადამიანი გარდაიცვალა ერთ დღეში. გარდაცვლილთა მეოთხედი მედპერსონალია – ექიმები და ექთნები.
მედპერსონალი სუჩაევაში ადგილობრივ ხელისუფლებას ადანაშაულებს. მათი თქმით, ხელისუფლებამ ისინი ვერ უზრუნველყო ნიღბებითა და თავდაცვის სხვა საშუალებებით.
„სიკვდილზე გვიშვებენ. არ გვაქვს რეზინის ხელთათმანები, ნიღბები, სადეზინფექციო საშუალებები, კომბინეზონების დეფიციტია, არაფერი გვაქვს, როგორ ვუმკურნალოთ ინფიცირებულებს? ექიმები ვართ და არა ჯადოქრები,“ – აცხადებს რუმინელი ექიმი, რომელიც საკუთარ ვინაობას არ ამხელს. ქალაქში საგანგებო რეჟიმია გამოცხადებული, მდგომარეობას პოლიცია და ჯარი აკონტროლებს.
რუმინეთში მედპერსონალის პროტესტი მზარდია. კორონავირუსის ეპიდემიამ აჩვენა, რომ ჯანდაცვის დაფინანსება საკმარისი არ არის კრიტიკულ მდგომარეობასთან გასამკლავებლად. ინფექციისგან თავდაცვის ელემენტარული საშუალებების არარსებობის გამო რუმინეთში სულ უფრო და უფრო მეტი მედპერსონალი გადის პენსიაში.
„ჩვენი დადანაშაულება მარტივია, მაგრამ მოსთხოვო ექიმს ვირუსთან ბრძოლა ყველანაირი აღჭურვილობის გარეშე, უბრალოდ დანაშაულია,“ – ამბობს მედიცინის დოქტორი კამელია როიუ, თუმცა არიან სხვა რუმინელი ექიმები, რომლებსაც საპირისპირო აზრი აქვთ. ბუქარესტის ფლორესკის ჰოსპიტლის გადაუდებელი დახმარების განყოფილების ანესთეზიოლოგი, რადუ ტინკუ ამბობს, რომ კლინიკებში მომუშავე ყველა მედპერსონალი ვალდებულია დაეხმაროს პაციენტს და ამორალურია უარის თქმა დახმარებაზე, როცა ადამიანებს შველა სჭირდებათ.
საგანგებო მდგომარეობის გამოცხადების შემდეგ რუმინეთის ხელისუფლება პენსიაში გასული ექიმების სტატისტიკას არ ასაჯაროებს, მაგრამ ადგილობრივები ამაზე ბევრს საუბრობენ.
ქვეყნის პრემიერი, ლუდოვიკ ორბანი მოუწოდებს მედპერსონალს, პატივი სცენ ჰიპოკრატეს ფიცს და აცხადებს, რომ ახლა ქვეყნისთვის თითოეული ექიმი და ექთანი ძვირფასია. მისივე განცხადებით, ხელისუფლება იზრუნებს მოამარაგოს კლინიკები ვირუსისგან თავდაცვის აუცილებელი აღჭურვილობით.
რუმინეთის მოსახლეობა 19 მილიონია. ჯანდაცვის სისტემა მთელ ევროპაში ყველაზე მცირე რესურსით რუმინეთშია დაფინანსებული. მიუხედავად 2018 წელს ხელფასების 50%-იანი მატებისა, რუმინეთი დატოვა ათასობით ექიმმა დასავლეთ ევროპის ქვეყნებში მაღალანაზღაურებადი სამსახურის სანაცვლოდ. რუმინელები ძირითადად საფრანგეთში, გერმანიასა და დიდ ბრიტანეთში გადადიან საცხოვრებლად.
ქვეყნის ჯანდაცვის სამინისტროს ოფიციალური მონაცემებით, ბოლო 10 წლის განმავლობაში რუმინეთი 25 ათასმა ექიმმა დატოვა.
___________________
მთავარ ფოტოზე: საველე ჰოსპიტალი რუმინეთში, ბუქარესტთან ახლოს, 20 მარტი. ანდრეი პუნგოვიჩის ფოტო/AFP
