„ენერგო-პრო ჯორჯია“ განცხადებას ავრცელებს, სადაც ნათქვამია, რომ მომხმარებელთა უკლებლივ ყველა განაცხადი, რომლებიც თებერვალში მოხმარებულ ელექტროენერგიას შეეხებოდა, გადასახადების განწილვადების ან გადავადების შესახებ, კომპანიამ დააკმაყოფილა.
„უფრო მეტიც, მიღებულ იქნა უპრეცედენტო გადაწყვეტილება და მთელი მარტის განმავლობაში, არც ერთ აბონენტს, კომერციული აბონენტების ჩათვლით, ელექტროენერგიის მიწოდება არ შეწყვეტია (ყოველთვიურად, საშუალოდ, 40 ათას აბონენტს უწყდება ელმომარაგება დავალიანების გამო). ამ რთულ პერიოდში ეს იყო ძალიან მნიშვნელოვანი თანამშრომლობა, კომპანიასა და მის აბონენტებს შორის, რადგან ერთი მხრივ, კომპანიამ გაითვალისწინა მომხმარებელთა მძიმე მდგომარეობა და უარი თქვა გათიშვების წარმოებაზე, ხოლო მეორე მხრივ, აბონენტთა დიდმა ნაწილმა დროულად მოახდინა დავალიანების დაფარვა ან მოითხოვა გადახდის შეღავათიანი პირობები. აბონენტთა მხოლოდ მცირე ნაწილმა კი არ განახორციელა ანგარიშსწორება და არც დავალიანების განწილვადება მოითხოვა,“ – ნათქვამია კომპანიის მიერ გავრცელებულ განცხადებაში.
„ენერგო-პრო ჯორჯიაში“ აცხადებენ, რომ კომპანიისთვის მომდევნო თვეებში მნიშვნელოვანი დახმარება იქნება საქართველოს მთავრობის მიერ განსაზღვრული სუბსიდირება, რომლის ფარგლებშიც 200 კილოვატსაათის ჩათვლით მოხმარება სრულად აუნაზღაურდებათ აბონენტებს.
„შესაბამისად, მოხარული ვართ, რომ ვადაგაცილებული დავალიანების მქონე აბონენტების რაოდენობა საგრძნობლად შემცირდება. იმის გათვალისწინებით, რომ პირველი შოკი გადავლილია, აგრეთვე აბონენტთა უმრავლესობას შეეხება ხსენებული სუბსიდირება, აპრილში კომპანია გეგმავს ჩვეულ რეჟიმში განაგრძოს დარიცხული თანხების აკუმულირება, მათ შორის ზოგიერთ შემთხვევაში გამოიყენებს ელექტროენერგიის მომარაგების შეწყვეტის პროცედურას. შეზღუდვები პირველ რიგში შეეხება იმ აბონენტებს, რომლებმაც მარტის განმავლობაში არ განახორციელეს თებერვალში მოხმარებული ელექტროენერგიის საფასურის ანგარიშსწორება ან არ შეათანხმეს გადახდის შეღავათიანი პირობები,“ – ვკითხულობთ კომპანიის მიერ გავრცელებულ განცხადებაში.
,,ენერგო-პრო ჯორჯიაში“ აცხადებენ, რომ კვლავ გაგრძელდება მოსახლეობის მომართვების განხილვა და დავალიანების განწილვადების პირობებზე შეთანხმება. ,,ენერგო-პრო ჯორჯიასთვის“ მიმართვა შესაძლებელია კომპანიის ქოლცენტრის (0322471707) მეშვეობით, აგრეთვე ვებგვერდიდან უფასო ვებზარის (https://www.energo-pro.ge), ვებგვერდის კონტაქტების ველიდან შეტყობინების გაგზავნის, ელექტრონული ფოსტის (info@energo-pro.ge) და სოციალური გვერდის მეშვეობით (https://www.facebook.com/energoprogeorgia/).
„კომპანია არის სადისტრიბუციო პროფილის, რომელიც სხვადასხვა მომწოდებლისგან შეისყიდის ელექტროენერგიას და აწვდის აბონენტებს. ამიტომ, დარიცხული ელექტროენერგიის საფასურის სრულად ვერშეგროვება ავტომატურად გამოიწვევს ელექტროენერგიის მომწოდებლებთან ანგარიშსწორების შეფერხებას, რაც, რა თქმა უნდა, კიდევ უფრო გაართულებს კომპანიაში არსებულ არასახარბიელო ფინანსურ მდგომარეობას,“ – ნათქვამია კომპანიის მიერ გავრცელებულ განცხადებაში.
