„ენერგო-პრო ჯორჯიას“ ინფორმაციით, შუქი ბათუმში რამდენიმე დასახლებაში გაითიშა: შუა მახინჯაურში, ორთაბათუმში, აგარაში, მასაურაში, ყოროლისთავში, ფერიასა და სამებაში. უშუქოდაა ასევე დარჩენილი ქობულეთის რამდენიმე სოფელი.
ენერგოკომპანიის პრესცენტრის ინფორმაციით, თოვის შედეგად კომპანიის ინფრასტრუქტურა დაზიანდა: „მოგლეჯილმა ხეებმა ელ.ენერგიის გადამცემი ბოძები წააქცია და სადენები დააზიანა. რთული მეტეოროლოგიური პირობების გამო გართულდა აღდგენითი სამუშაოები. სს ,,ენერგო-პრო ჯორჯია“ საგანგებო რეჟიმში აგრძელებს მუშაობას,“ – მოგვწერეს „ენერგო-პრო ჯორჯიადან“.
ასევე, ქობულეთში ელ.ენერგიის მიწოდება ნაწილობრივ შეზღუდულია: დაგვაში,კვირიკეში ,აჭყვისთავში, ალამბარში, ზენითში, ლეღვაში, ჯიხანჯურში, ხუცუბანში, ჭახათში, გვარასა და მიმდებარე ტერიტორიების ნაწილში.
„დილიდან სამუშაოები განახლებულია ყველა მიმართულებით, სავარაუდოდ დღის ბოლომდე სრულად აღდგება მიწოდება,“ – აღნიშნეს „ენერგო-პრო ჯორჯიას“ პრესცენტრში.
ენერგოკომპანიის პრესცენტრის ინფორმაციით, შუქის მიწოდება ეტაპობრივად დღეს, 22 თებერვალს, დღის განმავლობაში აღდგება. აქ ასევე გვითხრეს, რომ ელექტროენერგიის მიწოდების პრობლემა ამჯერად აჭარის მაღალმთიან მუნიციპალიტეტებში არ გვაქვს.
მთავარი ფოტო: დაზიანებული ელექტროსადენები ბათუმში. „ენერგო პრო ჯორჯიას“ ფოტო
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით 23 და 24 თებერვალს აჭარაში შენარჩუნებული იქნება თოვა, ზოგან ძლიერი. მოსალოდნელია ქარის გაძლიერება 17-22 მეტრ/წამამდე:
ძლიერი ქარი და თოვაა მოსალოდნელი აჭარაში და ზღვის სანაპირო ზოლში – სააგენტო
