ავსტრალიაში მეცნიერებმა დაიწყეს კორონავირუსის ორი პოტენციური ვაქცინის ტესტირება “milestone” ლაბორატორიულ კვლევებში.
BBC წერს, რომ ოქსფორდის უნივერსიტეტისა და ამერიკული კომპანია Inovio Pharmaceutical-ის მიერ შექმნილი ვაქცინები ჯანდაცვის მსოფლიო ორგანიზაციის მიერ ცხოველებზე გასატესტად ნებადართულია. ავსტრალიის ეროვნული სამეცნიერო სააგენტო შეაფასებს მის ეფექტურობას, იქნება თუ არა ეს ვაქცინები ადამიანებისთვის უსაფრთხო.
ახალი კორონავირუსის საწინააღმდეგო ვაქცინის პირველი კვლევა ადამიანზე აშშ-ი, მარტის თვეში ჩატარდა, მაგრამ იქ გამოტოვებული იყო ცხოველზე ტესტირების ეტაპი.
მსოფლიოში კიდევ რამდენიმე ვაქცინის შემუშავებაზე მუშაობენ სპეციალისტები, მაგრამ ავსტრალიის სამეცნიერო და სამრეწველო კვლევითი ორგანიზაცია (CSIRO) ამბობს, რომ ეს არის პირველი კომპლექსური პრე-კლინიკური კვლევები ვაქცინისა, ცხოველის მოდელის გამოყენებით.
“როგორც წესი, ამ ეტაპამდე მისვლას სჭირდება 1-2 წელი და ჩვენ ეს პერიოდი, ფაქტობრივად, რამდენიმე თვემდე შევამოკლეთ”, – ამბობს BBC-თან CSIRO-ს წარმომადგენელი, ექიმი რობ გრენფელი.
როგორ იმუშავებს?
BBC წერს, რომ ბოლო რამდენიმე დღის განმავლობაში CSIRO-ის გუნდმა ვაქცინის სინჯები გაუკეთა ქრცვინებს – პატარა, ბეწვიან ძუძუმწოვრებს, რომლებშიც დამტკიცებულია, რომ კორონავირუსით ინფიცირება ადამიანების მსგავსად ხდება.
Sars-CoV-2 არის ვირუსი, რომელიც იწვევს დაავადებას Covid-19. ამჟამად, მთელი მსოფლიოს მასშტაბით, მიმდინარეობს სულ ცოტა 20 ვაქცინაზე მუშაობა.
CSIRO ტესტავს ორ ალტერნატივას, რომლებიც გლობალური კონსორციუმის – “კოალიცია ეპიდემიური მზაობის ინოვაციებისთვის” – მიერ არის შერჩეული.
ერთ-ერთი ალტერნატივა, რომელიც შეიმუშავა ოქსფორდის უნივერსიტეტმა, ვექტორული ვაქცინაა. იგი იყენებს “დეფექტურ” ვირუსს, რათა კორონავირუსის ცილები შეიყვანოს იმუნურ სისტემაში და სტიმული მისცეს მასზე იმუნურ პასუხს.
“თუმცა, მათ არ შეუძლიათ გამრავლება… ასე რომ არ არსებობს ალბათობა იმისა, რომ ამ კონკრეტული ვაქცინის შედეგად განვითარდეს დაავადება”, – თქვა პროფესორმა ტრევორ დრიუმ, რომელიც “ავსტრალიის ცხოველთა ჯანდაცვის ლაბორატორიის” დირექტორია, სადაც ეს სამედიცინო ცდა ტარდება.
მეორე ვაქცინა კი, რომელიც Inovio-ის მიერაა შემუშავებული, შექმნილია იმგვარად, რომ მოახდინოს კორონავირუსის კონკრეტული ცილების კოდირება იმუნურ სისტემაში, რითაც სხეულის უჯრედებს დაასტიმულირებს, რომ წარმოქმნას ცილები მანამ, სანამ იმუნური სისტემა მოახდენს მათზე რეაგირებას.
როდის გვექნება კვლევის შედეგები?
მეცნიერების თქმით, ცხოველებზე ტესტირების პირველი შედეგები შესაძლოა უკვე ივნისში გახდეს ცნობილი. წარმატების შემთხვევაში, ვაქცინები გადავა კლინიკურ კვლევებში (კვლევები, როცა მოხალისეები მონაწილეობენ), რომლებიც ჩატარდება სხვადასხვა ლაბორატორიაში.
მართალია, ვირუსის პრევენციისთვის ვაქცინის შემუშავებაზე კვლევები დაჩქარებულია, მაგრამ ექსპერტების თქმით, იმისთვის, რომ წამალი შესაბამისობაში იყოს სტანდარტებსა და ნორმატიულ კვლევებთან, 18 თვე მაინც არის საჭირო.
“ვაქცინის თითოეულ ალტერნატივის შექმნაში ჩართულია უამრავი კომპანია და ორგანიზაცია, რადგან რეალურად არ არსებობს ერთი ჯგუფი, რომელსაც ვაქცინის წარმოება შეუძლია”, – განაცხადა ექიმმა გრენფელმა. თუმცა დასძინა, რომ “ოპტიმისტურად” უყურებს იმ სამუშაოებს, რომლებიც გლობალური თანამშრომლობის დონეზეა აყვანილი.
