Batumelebi | ხულოში ხიხაძირისკენ მიმავალი გზა მეწყერმა ჩაკეტა ხულოში ხიხაძირისკენ მიმავალი გზა მეწყერმა ჩაკეტა – Batumelebi

ხულოში ხიხაძირისკენ მიმავალი გზა მეწყერმა ჩაკეტა

ზამლეთი-ხიხაძირის დამაკავშირებელი გზის მე-19 კილომეტრზე, ხულოში, სოფელ ფუშრუკაულსა და კვატიას შორის ტერიტორიაზე, დღეს, პირველ აპრილს, მეწყერი ჩამოწვა.

ხულოს მერიის ინფორმაციით, აღნიშნულ ტერიტორიაზე დღის მეორე ნახევარში ჩამოშლილმა მიწის მასამ საავტომობილო მოძრაობა სრულად გადაკეტა.

გზის გაწმენდის სამუშაოები გვიან საღამომდე მიმდინარეობდა. გაწმენდის სამუშაოებს აჭარის საავტომობილო გზების დეპარტამენტის თანამშრომლები აწარმოებენ.

მერიის ინფორმაციით, რაღაც მონაკვეთში მოხერხდა გზის გახსნა მაღალი გამავლობის ავტომობილებისთვის, თუმცა მიწა ისევ ჩამოიშალა და მოძრაობა კვლავ ჩაკეტილია.

„ტექნიკა ხვალ, დილის 5 საათიდან განაახლებს სამუშაოებს. პრობლემა არის ისიც, რომ ჩამოშლილმა მიწამ მრავალწლოვანი ხეებიც ჩამოიყოლა და ამ ჩამოშლილ მასას, რასაც გზიდან გაიტან, იქვე ვერ დაყრი, მოშორებით გადააქვთ,“ – გვითხრეს ხულოს მერიაში.

მეწყერი ხიხაძირისკენ მიმავალ გზაზე / ფოტო: ხულოს მერია

მეწყერი ხიხაძირისკენ მიმავალ გზაზე / ფოტო: ხულოს მერია

____________________

მთავარი ფოტო: მეწყერი ხიხაძირისკენ მიმავალ გზაზე / ფოტო: ხულოს მერია

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com