Batumelebi | ვინ არ გადაიხდის წყლის და სანდასუფთავების საფასურს ბათუმში ვინ არ გადაიხდის წყლის და სანდასუფთავების საფასურს ბათუმში – Batumelebi
RU | GE  

ვინ არ გადაიხდის წყლის და სანდასუფთავების საფასურს ბათუმში

საქართველოს პრემიერ-მინისტრის განცხადებით, 2020 წლის მარტის, აპრილისა და მაისის თვის წყლისა და სანდასუფთავების გადასახადს მოქალაქეების ნაწილს სახელმწიფო დაუფარავს.

ბათუმის შემთხვევაში, წყალმომარაგებისა და დასუფთავების კუთხით მომსახურების მომწოდებელი კომპანიები ბათუმის მერიის შპს-ები არიან: „ბათუმის წყალი“ და „სანდასუფთავება“.

„ბათუმის წყალში“ პრემიერის განცხადებასთან დაკავშირებით გვითხრეს, რომ ელოდებიან შესაბამისი უწყებების კონკრეტულ მითითებებს ამ საკითხზე.

„ბათუმელები“ დაინტერესდა, სუბსიდირება ყველა აბონენტს შეეხება, თუ არის რაიმე შეზღუდვა, როგორც, ვთქვათ, გაზის ან დენის შემთხვევაში.

„დეტალურ ინფორმაციას აბონენტებს უახლოეს პერიოდში დამატებით ვაცნობებთ“, – გვითხრეს „ბათუმის წყალში“.

რაც შეეხება „სანდასუფთავებას“, ქალაქის მერიაში გვითხრეს, რომ მიმდინარეობს სუბსიდირების საკითხის განხილვა.

საქართველოს ენერგეტიკისა და წყალმომარაგების ეროვნული კომისიის [სემეკი] განმარტებით კი, წყალმომარაგებისა და დასუფთავების გადასახადი დაეფარებათ მხოლოდ იმ აბონენტებს, რომელთაც აქვთ 200 კვტსთ-ის ჩათვლით ელექტროენერგიის მოხმარება. წყალმომარაგების გადასახადის დაფარვა მოხდება როგორც გამრიცხველიანებული, ასევე უმრიცხველო (სულადობრივი დარიცხვით) მომხმარებლებისათვის.

მთავრობის გადაწყვეტილება ელექტროენერგიის გადასახადის სუბსიდიაზე, „ენერგო-პრო ჯორჯიას” შემთხვევაში, შეეხება იმ მოქალაქეებს, რომელთა მარტის თვის გადასახადი მაქსიმუმ 36,4 ლარია.

შესაბამისად, ბათუმის შემთხვევაში, იმ აბონენტებს, რომლებსაც შეეხებათ სუბსიდია ელექტროენერგიაზე, სახელმწიფო გადაუხდის წყლისა და სანდასუფთავების გადასახადსაც.

სემეკში „ბათუმელებს“ უთხრეს, რომ ტექნიკური დეტალები ზუსტდება, თუმცა, იმ აბონენტებმა, რომლებსაც დენის გადასახადს სახელმწიფო დაუფარავს, შეუძლიათ არ გადაიხადონ წყლის და დასუფთავების მარტის თვის გადასახდი. „ასეთ შემთხვევაში ამ აბონენტებს წყლის მიწოდება არ შეუწყდებათ“, – გვითხრეს სემეკში.

ბათუმში მოსახლეობა წყლის გადასახადს იხდის როგორც სულადობით, ასევე მრიცხველის ჩვენების მიხედვით.

მოსახლეობისთვის, ვინც წყალს მრიცხველის გარეშე მოიხმარს, გადასახადი ყოველთვიურად არის 1 სულზე 1,65 ლარი [წყალი – 1,20 და წყალარინება – 0,65 ლარი];

მრიცხველის ჩვენების მიხედვით, კი მოსახლეობა 1 კუბ/მ [1 ტონა] მოხმარებული წყლისთვის იხდის 51 თეთრს [წყალი – 33 თეთრი და წყალარინება – 18 თეთრი].

ბათუმში მოქალაქეები სანდასუფთავების გადასახადს სულადობის მიხედვით იხდიან. ერთ სულზე გადასახადი თვეში 1,3 ლარია, თუმცა 5 და მეტსულიანი ოჯახები, თვეში 6,5 ლარს იხდიან.

პრემიერ-მინისტრის განცხადებით, საქართველოს ყველა მოქალაქეს, რომელიც თვეში მოიხმარს 200 კილოვატზე ნაკლებ ელექტროენერგიას და 200 კუბზე ნაკლებ ბუნებრივ გაზს, სამი თვის განმავლობაში – მარტში, აპრილსა და მაისში სრულად დაუფინანსდება კომუნალური გადასახადები.

„აქ შედის, რა თქმა უნდა, დასუფთავებისა და წყლის გადასახადიც“ – განაცხადა გიორგი გახარიამ.

ამ თემაზე:

შეძლებთ, უარი თქვათ სახელმწიფოს დახმარებაზე და კომუნალურები თავად გადაიხადოთ – სემეკი

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com