ბათუმში დღეს, 30 მარტს, კორონავირუსის ახალი შემთხვევა დადასტურდა. ჯანდაცვის სამინისტროში დღეს „ბათუმელებს“ უთხრეს, რომ პაციენტს ინფიცირებულ პირთა კონტაქტისას გადაედო Covid-19.
„მთავარის“ მიერ დღეს გავრცელებული ინფორმაციის თანახმად, ინფიცირებული პირი ბათუმის ინფექციური საავადმყოფოს ექიმია. „ბათუმელებმა“ ეს ინფორმაცია აჭარის ჯანდაცვის მინისტრთან, ზაალ მიქელაძესთან გადაამოწმა.
„ბათუმელებმა“ აჭარის ჯანდაცვის მინისტრს ჰკითხა, იყო თუ არა ინფიცირებული ექიმი, რაც მინისტრმა უარყო. კითხვაზე, იყო თუ არა ინფიცირებული საავადმყოფოს სამედიცინო პერსონალის წარმომადგენელი, მინისტრმა გვითხრა: „თქვენ მკითხეთ იყო თუ არა ექიმი. მე გეუბნებით რომ არ არის ექიმი. დანარჩენს ეტაპობრივად მოგახსენებთ“.
„ნამდვილად ვადასტურებ, რომ ეს არის იმ დადასტურებული შვიდი შემთხვევიდან ერთ-ერთთან კონტაქტი. აქედან გამომდინარე, მასზე ისედაც დამყარებული იყო ეპიდზედამხედველობა და ტემპერატურის დაფიქსირების შემდეგ გადაყვანილი იქნა კლინიკაში. ჩატარებული ლაბორატორიული ტესტით მას დაუდასტურდა კორონავირუსი. არის მსუბუქი მიმდინარეობის ჯერჯერობით, მინიმალური კლინიკური ნიშნებით. გადაიყვანენ „მედალფაში“ და იქ გააგრძელებს მკურნალობას. ახალი გადაწყვეტილებით, პაციენტები დადასტურებული კორონავირუსით გადაგვყავს „მედალფაში“, რადგან ინფექციური საავადმყოფო იქნება ე.წ. „ცხელების ცენტრი“, სადაც შევლენ პირველადი პაციენტები“, – გვითხრა ზაალ მიქელაძემ.
რაც შეეხება გავრცელებულ ინფორმაციას, რომ ინფიცირება მოხდა ფილტვის ინტუბაციის დროს, ზაალ მიქელაძე ამას კატეგორიულად უარყოფს. „ფილტვის ინტუბაციას აკეთებს მხოლოდ ექიმი და ეს ინტუბაცია გაკეთდა იმ პაციენტზე, რომელიც მედალფაშია. აქედან გამომდინარე ეს არ არის ნამდვილად სწორი ინფორმაცია“ – გვითხრა მან.
განმეორებით კითხვაზე, უარყოფთ თუ არა, რომ ინფიცირებული არის სამედიცინო პერსონალიდან, ზაალ მიქელაძემ ასე გვიპასუხა:
„აი, მაგას კვლევის ეტაპს რომ დავასრულებთ, მერე გეტყვით. იმიტომ, რომ ყველა შესაძლო შემთხვევა, რაც შეიძლება იყოს კავშირში ამა თუ იმ ინფიცირებულთან, საჭიროებს ძალიან დეტალურ, ღრმა კვლევას, თავისი ყველა შესაძლო გადაადგილებით, კონტაქტით და ა.შ. და გესმით ალბათ, რატომაც არ ვადასტურებთ, ვიდრე ეპიდკვლევა არ დასრულდება, რომ ვინმე ამ ეპიდკვლევიდან არ ამოვარდეს. ამიტომ არასდროს არ ვადასტურებ კონკრეტულ შემთხვევას, ვიდრე ეპიდკვლევის რუქები არ გვეცოდინება“.
ბოლო მონაცემებით, აჭარაში კორონავირუსის დადასტურებული დიაგნოზით უკვე 8 პაციენტს მკურნალობენ.
29 მარტის 11 საათის მდგომარეობით ქვეყანაში კორონავირუსით ინფიცირების 103 დადასტურებული შემთხვევაა, მათგან გამოჯანმრთელდა 18 პაციენტი.
