ქვეყნის საკარანტინო ზონებში სამხედრო მოსამსახურეთა მშრალი ულუფის, ასევე, სხვა საჭირო პროდუქტებით მომარაგებისა და პროდუქტის მარაგების შესაქმნელად, შპს „სახელმწიფო კვებითი უზრუნველყოფა“ 7 მილიონამდე ლარის შესყიდვას გამარტივებული წესით განახორციელებს.
შესყიდვის ტენდერის გარეშე განხორციელების მიზეზად კორონავირუსის (COVID-19) გავრცელება (პანდემია) და საქართველოს ცალკეული რეგიონებში საკარინტინო რეჟიმის დაწესება სახელდება.
„ასევე, შექმნილი მდგომარეობიდან გამომდინარე, არსებული მომწოდებლები ვერ უზრუნველყოფენ სურსათის სტაბილურ მოწოდებას ვალუტის კურსისა და სხვა ქვეყნების მიერ დაწესებული შეზღუდვებიდან გამომდინარე. ამასთან, მნიშვნელოვანია სურსათის შეძენა მოხდეს (პირდაპირი გზით ან შუამავლის მეშვეობით) სხვა სახელმწიფოებისგან, რათა არ განხორციელდეს ქვეყანაში არსებული სასურსათო მარაგების გახარჯვა“, – აღნიშნულია „სახელმწიფო კვებითი უზრუნველყოფის“ მიერ შესყიდვების სააგენტოში გაგზავნილ წერილში.
„სახელმწიფო კვებითი უზრუნველყოფა“ ასევე აღნიშნავს, რომ „კორონავირუსის შიდა გავრცელების გამო, ქვეყანაში ყოველდღიურად იცვლება სიტუაცია – მომწოდებლები ვერ უზრუნველყოფენ სურსათის სტაბილურ მოწოდებას ვალუტის კურსისა და სხვა ქვეყნების მიერ დაწესებული შეზღუდვებიდან გამომდინარე… ელექტრონული ტენდერის ან კონკურსის პროცედურების გათვალისწინებით კი, ზემოაღნიშნულის განხორციელება ვერ მოხდება დროულად“.
თითოეული შესყიდვის საჭიროება დგება კონკრეტული ვითარებიდან გამომდინარე; სხვადასხვა პერიოდში, ეტაპობრივად, შესასყიდი იქნება სხვადასხვა სახის საკვები და სასმელი პროდუქტები, მიწოდებისთვის საჭირო ინვენტარი და სხვა.
პროექტით გათვალისწინებული ღონისძიებები განხორციელდება 4 თვის განმავლობაში.
შპს „სახელმწიფო კვებითი უზრუნველყოფა“, სახელმწიფო კომპანიაა, რომლის წილის მმართველი თავდაცვის სამინისტროა. ეს კომპანია თავდაცვის ძალების მოსამსახურეთა კვებით მომსახურებას ახორციელებს.
