Batumelebi | პრაქტიკოსი მასწავლებლებისთვის საგნობრივ გამოცდებზე რეგისტრაცია იწყება პრაქტიკოსი მასწავლებლებისთვის საგნობრივ გამოცდებზე რეგისტრაცია იწყება – Batumelebi

პრაქტიკოსი მასწავლებლებისთვის საგნობრივ გამოცდებზე რეგისტრაცია იწყება

საქართველოს განათლების სამინისტროს ინფორმაციით, პრაქტიკოსი მასწავლებელებისა და მასწავლებლობის მსურველთათვის საგნობრივი კომპეტენციის დამადასტურებელ გამოცდებზე რეგისტრაცია იწყება.

საგნის გამოცდის, ასევე, საგნობრივი და პროფესიული კომპეტენციების დადასტურების ტესტირებისათვის მსურველთა რეგისტრაცია დაიწყება 30 მარტის 10:00 საათზე ელექტრონულად, ვებგვერდზე:  online.naec.ge  და 30 აპრილის 18:00 საათამდე გაგრძელდება.

სამინისტროს ინფორმაციით, წინასაგამოცდო პერიოდში შეფასებისა და გამოცდების ეროვნული ცენტრი აპლიკანტებს ონლაინკონსულტაციებს სთავაზობს, რომელიც ყოველ ხუთშაბათს, 13:00 საათიდან 16:00 საათამდე ცენტრის ოფიციალურ ფეისბუქგვერდზე გაიმართება. კონსულტაციები შეეხება როგორც რეგისტრაციის პროცესს, ასევე საგამოცდო პროცედურებს.

რაც შეეხება ტესტირებას, მასში მონაწილეობის უფლება აქვს:

  • მასწავლებლის პროფესიული განვითარებისა და კარიერული წინსვლის სქემაში განაწილებულ პრაქტიკოს მასწავლებელს
  • ბაკალავრს, მაგისტრს და/ან მათთან გათანაბრებული აკადემიური ხარისხის მქონე პირს. ასევე პირს, რომელიც სწავლობს აღნიშნული საბაკალავრო/სამაგისტრო პროგრამის დამამთავრებელ კურსზე; ან აქვს სამხედრო/სასპორტო პროფესიული განათლება
  • მასწავლებლობის მსურველს, რომელსაც დიპლომის საფუძველზე აქვს მასწავლებლობის უფლება ან სწავლობს აღნიშნული საგანმანათლებლო პროგრამის დამამთავრებელ კურსზე

თუ პირს არ აქვს რომელიმე ზემოაღნიშნული კვალიფიკაცია, მასწავლებლის საქმიანობის მიზნებისათვის ის საგნის გამოცდაზე მიღებულ შედეგს ვერ გამოიყენებს. პედაგოგობის მსურველ პირს  მხოლოდ საგნის გამოცდის ჩაბარება შეეძლება.

პრაქტიკოსი მასწავლებლის მიერ საგნობრივი და პროფესიული კომპეტენციის ყოველი შემდგომი დადასტურება აუქმებს პრაქტიკოსი მასწავლებლის მიერ იმავე საგანში საგნობრივი და პროფესიული კომპეტენციის დადასტურებისას მიღებულ შეფასებას და შესაბამის კრედიტქულებს.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com