საქართველო-თურქეთს შორის მგზავრთა მიმოსვლა დროებით შეწყვეტილია. დღეს, 18 მარტს, დაიხურა ვალესა და კარწახის სასაზღვრო გამშვები პუნქტებიც. ინფორმაციას ამის შესახებ CNN TURK-ი ავრცელებს.
საზღვარზე თავისუფლად გადაადგილდებიან სატვირთო ავტომობილები და შეთანხმებისამებრ, ტვირთბრუნვა შეუფერხებლად გაგრძელდება.
თურქეთისა და საქართველოს მთავრობებს შორის შეთანხმების საფუძველზე, ორ ქვეყანას შორის არსებული სამი სასაზღვრო-გამტარი პუნქტიდან ერთ-ერთზე – სარფის გამტარ პუნქტზე, ქვეითთა მოძრაობა ორმხრივად 15 მარტს, საღამოს 18:00 საათზე, შეწყდა. 18 მარტამდე ღია იყო ვალე და კარწახი.
საქართველოში კორონავირუსის (COVID-19) გავრცელების საპრევენციო ღონისძიებების ფარგლებში, საქართველოს მთავრობამ მიიღო გადაწყვეტილება საქართველოში უცხო ქვეყნის მოქალაქეების შემოსვლაზე შეზღუდვის დაწესების შესახებ. შეზღუდვები 2020 წლის 18 მარტის 00:00-დან ამოქმედდა და ძალაში ორი კვირის განმავლობაში იქნება.
საქართველოს საგარეო საქმეთა სამინისტროს განცხადებით, შეზღუდვები შეეხება უცხო ქვეყნის ნებისმიერ მოქალაქეს, გარდა შემდეგი პირებისა:
- საქართველოში აკრედიტებული დიპლომატიური მისიების, საერთაშორისო ორგანიზაციების წარმომადგენლები და მათი ოჯახის წევრები;
- შერეული ოჯახები, რომელშიც ერთ-ერთი მეუღლე, ან არასრულწლოვანი შვილი არის საქართველოს მოქალაქე;
- ჰუმანიტარული მისიით მომავალი პირები – თუ დღის წესრიგში დადგა ასეთი მისიის მოვლენის აუცილებლობა (ექიმები, მოხალისეები…);
- მოქალაქეობის არმქონე პირის სტატუსის მქონე პირები – გაცემული საქართველოს შესაბამისი ორგანოს მიერ;
- სტატუს-ნეიტრალური დოკუმენტის მქონე პირები;
- საქართველოში ლტოლვილის სტატუსის მქონე პირები;
- ოფიციალური დელეგაციების საკითხი გადაწყდება ყოველ კონკრეტულ შემთხვევაში, ინდივიდუალურად.
სარფის საბაჟო დროებით, მაგრამ გაურკვეველი ვადით ჩაიკეტა [ფოტო]
