დღეს, 18 მარტს, გამართულ ბრიფინგზე საქართველოს ეკონომიკისა და მდგრადი განვითარების მინისტრს, ნათია თურნავას ჰკითხეს, ხომ არ ხედავს მთავრობა ავიაკომპანიების სუბსიდირების საჭიროებას საქართველოს იმ მოქალქეების ჩამოსაყვანად, რომლებმაც ამ დრომდე ვარ მოახერხეს ქვეყანაში დაბრუნება.
მინისტრის განმარტებით, მთავრობა სუბსიდირების საკითხს განიხილავს კომერციული რეისების მდგრადობისთვის, იმ ზარალის შესავსებად, რომელიც კომპანიებს მიადგა პოტენციური მგზავრების დაკარგვის გამო, რაც უცხო ქვეყნის მოქალქეების ჩამოსვლის აკრძალვამ გამოიწვია.
ასეთ დანახარჯს სახელმწიფო მხოლოდ საქართველოს მოქალაქეების ქვეყანაში დასაბრუნებლად მიიღებს, თუმცა, მინისტრის თქმით, ეს იმას არ ნიშნავს, რომ ბილეთები უფასო იქნება, ამ მხრივ იქნება მხოლოდ შეღავათები:
„სახელმწიფო მიდის ბიზნესის მხარდაჭერის უპრეცედენტო ზომებზე. ვეხმარებით, განსაკუთრებით ბიზნესის იმ ნაწილს, რომლებიც დარტყმის ქვეშ აღმოჩნდნენ. დარტყმის ქვეშ აღმოჩნდა ტურიზმი და ჩვენ დავეხმარეთ მილიარდიანი პაკეტით, ასევე დარტყმის ქვეშ აღმოჩნდა ქართული ავიაციაც, ზოგადად, გლობალური ავიაცია, ეს მარტო ჩვენ არ გვეხება.
შეთანხმებულები ვართ, რომ იქ, სადაც საქმე ეხება საქართველოს მოქალაქეების ჩამოყვანას, გავწევთ ყველა საჭირო დახმარებას, იქნება ეს სუბსიდია თუ რაიმე სხვა სახის. ეს არის სუბსიდია არა რომელიმე კომპანიისთვის… თუმცა არც ამას მოვერიდებით დღეს, ჩვენი მოქალაქეების დროულად და შეუფერხებლად ჩამოყვანის თვალსაზრისით.
აქ საუბარი არ არის უფასო რეისებზე, საუბარია კომერციულ რეისებზე. იმ პირობებში, როდესაც ჩვენ ავკრძალეთ უცხო ქვეყნის მოქალაქეების ჩამოსვლა, პოტენციური მგზავრები გამოაკლდნენ ამ კომპანიებს და რა თქმა უნდა, ქართველი მოქალაქეები ვერ იქნება იმ რაოდენობით წარმოდგენილი, რომ ხომალდის გაგზავნა იყოს შესაძლებელი. კომერციულად ჩვენ გარკვეულ თანამონაწილეობას გავიღებთ და შევავსებთ, მაგრამ ბილეთები იქნება ფასიანი.
ასევე გეტყვით, ჩვენ შევთანხმდით, რომ ბილეთების ფასი, რომელიც იწვევდა გარკვეულ კრიტიკას, იმიტომ, რომ საკმაოდ მაღალი იყო, ასეთი თანამონაწილეობის შედეგად დაიკლებს და იქნება ხელმისაწდომი,“ – განაცხადა ნათია თურნავამ.
