ჯანმრთელობის მსოფლიო ორგანიზაციის [ჯანმო] მიერ განსაზღვრულ კორონავირუსის ეპიდემიური რისკის მქონე ქვეყნებს შვეიცარია, ნორვეგია და დანია დაემატა. ასეთი ქვეყნების რიცხვი უკვე 11-მდე გაიზარდა. მათ შორისაა ჩინეთი, ირანი, სამხრეთ კორეა, იტალია, ავსტრია, საფრანგეთი, გერმანია და ესპანეთი.
საქართველოს საბაჟო გამშვებ პუნქტებში, [მათ შორის პორტებსა და აეროპორტებში] შემოსავლების სამსახურის ეპიდემიოლოგების მიერ ხდება მგზავრთა [მათ შორის ტრანზიტული], ინდივიდუალური მონიტორინგი, რაც გულისხმობს მგზავრთან გასაუბრებას, ტემპერატურის გაზომვას, სათანადო კლინიკური ნიშნების შეფასებას და მიღებული ინფორმაციის საფუძველზე შესაბამისი დეტალური მოგზაურობის ანამნეზის შეკრებას.
შემოსავლების სამსახურის ინფორმაციით:
[checklist]
- კორონავირუსის გავრცელების რისკის შემცირების მიზნით, საქართველოში ჩამომსვლელი პირებისთვის, რომლებიც ბოლო 14 დღის განმავლობაში იმყოფებოდნენ ჯანმოს მიერ განსაზღვრულ ეპიდემიური რისკის მქონე ქვეყნებში [ჩინეთი, ირანი, სამხრეთ კორეა, იტალია, ავსტრია, საფრანგეთი, გერმანია, ესპანეთი, შვეიცარია, ნორვეგია და დანია] ან მოემგზავრებიან ასეთი ქვეყნების გავლით, უნდა წარმოადგინონ (СOVID-19) შემოწმების შესაბამისი ცნობა, რომელიც გაცემული უნდა იყოს ტრანზიტული ქვეყნის (ჯანმოს მიერ განსაზღვრული ეპიდემიური რისკის მქონე ქვეყნების გარდა) შესაბამისი ლაბორატორიის მიერ.
- ცნობის წარმოუდგენლობის შემთხვევაში პირები გაივლიან ეპიდემიოლოგიურ შემოწმებას და სავალდებულო 14- დღიან იზოლაციის პროცედურას.
- მაღალი ტემპერატურის, გამოხატული კლინიკური ნიშნების ან სხვა საეჭვო გარემოებების გამოვლენისას შემოსავლების სამსახურის ექიმი ეპიდემიოლოგი ავსებს რისკის ჯგუფის ქვეყნებიდან ჩამოსული მგზავრის სააღრიცხვო ბარათს (დანართი N9) და დადგენილი წესის თანახმად ინფორმაციას აწვდის დაავადებათა კონტროლისა და საზოგადოებრივი ჯანმრთელობის ეროვნულ ცენტრს.
- ქვეყანაში შემოსული მგზავრის რისკის პირველადი შეფასების შემდეგ, ეპიდემიოლოგიური მდგომარეობის საეჭვოდ მიჩნევის შემთხვევაში მიღებული იქნება გადაწყვეტილება მგზავრის იზოლაციისა და სპეციალიზებულ კლინიკაში გადაყვანის თაობაზე.
[/checklist]
კორონავირუსის გავრცელების პრევენციის მიზნით, საქართველოსა და თურქეთის მთავრობების ერთობლივი გადაწყვეტილებით, მიმდინარე წლის 15 მარტის 18:00 საათიდან, დროებით შეჩერდება მგზავრთა გადაადგილება „სარფის“ საბაჟო-გამშვებ პუნქტის გავლით. შეზღუდვები არ შეეხება ტვირთბრუნვას.
ჩვეულ რეჟიმში გააგრძელებს მუშაობას „ვალესა“ და „კარწახის“ საბაჟო-გამშვები პუნქტები.
ასევე მიღებულია ერთობლივი გადაწყვეტილება, 2020 წლის 14 მარტიდან, 10 დღის განმავლობაში საქართველო-სომხეთსა და საქართველო-აზერბაიჯანს შორის მოქალაქეების გადაადგილების დროებით შეჩერების შესახებ. შეზღუდვები სატვირთო გადაზიდვებზე არც აქ ვრცელდება.
ფინანსთა სამინისტროს შემოსავლების სამსახურის განცხადებით, ორივე მხარე უზრუნველყოფს სამშობლოში დაბრუნების სურვილის მქონე საკუთარი მოქალაქეების ქვეყანაში შეუფერხებელ შესვლას.
—
საქართველოში 15 მარტისდილის მონაცემებით, კორონავირუსის დადასტურებული სულ 30 შემთხვევაა. კარანტინის რეჟიმში იმყოფება 439 ადამიანი, ხოლო სტაციონალურ მეთვალყურეობას გადის – 64.
აჭარის ჯანდაცვის მინისტრის მოადგილის, ნინო ნიჟარაძის განცხადებით, აჭარის რეგიონში კორონავირუსის დადასტურებული შემთხვევა არ არის, თუმცა, ერთი ტესტის პასუხი გადაგზავნილია თბილისში, ლუგარის ლაბორატორიაში.
